بٷگٸن وبلىستىق قازاق دراما تەاترىندا اقىن, مەملەكەتتٸك سىيلىقتىڭ جەنە حالىقارالىق «الاش» ەدەبي سىيلىعىنىڭ لاۋرەاتى, «قۇرمەت» وردەنٸنٸڭ يەگەرٸ ەسەنعالي راۋشانوۆتىڭ «ەركەم, جايىق...» اتتى شىعارماشىلىق كەشٸ ٶتتٸ, دەپ حابارلايدى «قازاقپارات» تٸلشٸسٸ.
بيىل الپىس جاسقا تولعان اقىندى مەرەيتويىمەن وبلىس ەكٸمٸ التاي كٶلگٸنوۆ قۇتتىقتاپ, ەلباسىنىڭ «رۋحاني جاڭعىرۋ» باعدارلاماسى اياسىندا اتالمىش كەشتٸڭ ۇيىمداستىرىلعانىن جەتكٸزدٸ. «اق جايىق ٶڭٸرٸنٸڭ ەرەكشەلٸگٸن بارشا قازاق ەلٸ جاقسى بٸلەدٸ. كٷي اتاسى قۇرمانعازى مەن دينا, التى الاشقا ەن وزدىرعان مۇحيت, ونىڭ بەر جاعىندا جۇبان, قادىر سىندى قازاق ەدەبيەتٸنٸڭ قابىرعالى ٶكٸلدەرٸنٸڭ قاتارى سيرەگەن ەمەس. وسىنداي باي ٶڭٸرگە ارنايى كەلگەن ەسەنعالي راۋشانوۆتىڭ دا قازاق پوەزيياسىنداعى ورنى ەرەكشە. «رۋحاني جاڭعىرۋ» باعدارلاماسىنىڭ بٸر باعىتى ٶنەر مەن مەدەنيەت بولسا, مۇنىڭ بەرٸ بٸزدٸڭ ٶسٸپ-ٶركەندەۋٸمٸزدٸڭ كٶرٸنٸسٸ دەۋگە بولادى. ەكونوميكا ەل دامۋىنىڭ بٸر قاناتى بولسا, رۋحانييات - ەكٸنشٸ قاناتى. بٸر-بٸرٸنسٸز دامۋى مٷمكٸن ەمەس», - دەدٸ ٶڭٸر باسشىسى.
«بەسٸگٸن ەنمەن تەربەپ, جوقتاۋىن جىرمەن ايتاتىن قازاقتىڭ سٶز ٶنەرٸنٸڭ ورنى ايرىقشا. قايتا جاڭعىرعان دەۋٸردە قازاقتىڭ مىقتى اقىندارىنىڭ بٸرٸ, ٶزگەلەرمەن شاتاستىرۋعا بولمايتىن, كٶپشٸلٸكتٸڭ ٸشٸنەن دارا داۋسىمەن تانىلعان ەرەك تالانت يەسٸ ەسەنعالي راۋشانوۆ دەسەك, ەش ارتىق ەمەس. ەسەنعاليدىڭ جىرلارىنان دالانىڭ بوتاسىنان ارۋاناسىنا دەيٸنگٸ تابيعي مٸنەزدٸ تانىپ, بٸلۋگە بولادى. ارۋدىڭ بۇرىمىنداي ەدەمٸ ٶرٸلەتٸن قازاقتىڭ قارا ٶلەڭٸمەن-اق ۇلتتىق رۋحتى بيٸك كٶتەرٸپ كەلە جاتقان اقىن. ونىڭ سوناۋ جەلتوقسان كٶتەرٸلٸسٸ كەزٸندە دٷنيەنٸ دٷر سٸلكٸندٸرگەن «قارا باۋىر قاسقالداق» اتتى ٶلەڭٸنٸڭ ٶزٸ نەگە تۇرادى!? جاس ۇرپاق وسىنداي رۋحتى جىرلاردى وقىپ ٶسۋٸ كەرەك», - دەدٸ اقىن, قازاقستان جازۋشىلار وداعى بقو بٶلٸمشەسٸنٸڭ تٶرايىمى اقۇشتاپ باقتىگەرەەۆا.
كەشتە سونداي-اق جازۋشى-باسپاگەر, قازاقستاننىڭ ەڭبەك سٸڭٸرگەن قايراتكەرٸ مەرەكە قۇلكەنوۆ ەسەنعالي راۋشانوۆتىڭ 10-سىنىپتا جازعان توپتاما ٶلەڭدەرٸنە كەزٸندە ۇلى اقىندارىمىزدىڭ بٸرٸ جۇمەكەن نەجٸمەدەنوۆتٸڭ باسىن شايقاپ, تامسانعانىن ايتىپ, ونىڭ سٶزدٸك قورىنىڭ مولدىعىنا قازاق ەدەبيەتٸنٸڭ كوريفەيلەرٸ ەبٸش كەكٸلباەۆ پەن فاريزا وڭعارسىنوۆا تاڭعالىپ وتىراتىنىن جەتكٸزدٸ.
«ەسەنعالي جىرلارىنان ۇلى جىراۋلاردىڭ ۇلىق سارىنى انىق سەزٸلەدٸ. وسىدان التى جٷز جىل بۇرىن قارعا بويلى قازتۋعان جىراۋدىڭ ەدٸل مەن جايىق بويىنان بارماعىن قارس-قارس شايناپ, قالاي كەتكەنٸ ەلدٸڭ جادىنان ٶشە قويعان جوق. شىلبىرىن سٷيرەتٸپ, شىنجىرىن ٷزٸپ كەتكەن قازتۋعاننىڭ, مٸنە, سول جىرى اراعا عاسىرلار سالىپ, ەسەنعاليدىڭ كٶكمويناق تۇلپارىن مٸنٸپ, ەسەنعالي بولىپ قايتا ورالدى», - دەدٸ اقىن, تٶلەگەن ايبەرگەنوۆ اتىنداعى سىيلىقتىڭ لاۋرەاتى سۆەتقالي نۇرجانوۆ.
شىعارماشىلىق كەشتە اقىننىڭ ٶلەڭدەرٸ وقىلىپ, سٶزدەرٸنە جازىلعان ەندەر ورىندالدى.
«اقىن ەل الدىنا شىعىپ, ٶلەڭ وقىعاندا, حالىقتى ٷيرەتەمٸن دەمەۋٸ كەرەك. قايتا ودان ٷيرەنەمٸن دەۋٸ كەرەك. سوندىقتان مەنٸ قولدايتىن جۇرتشىلىقتىڭ بەرٸنە باسىمدى يەمٸن», - دەدٸ اقىن, مەملەكەتتٸك سىيلىقتىڭ يەگەرٸ ەسەنعالي راۋشانوۆ.
