Atyraýda memleket jáne qoǵam qairatkeri, halyq jazýshysy, Memlekettik syilyqtyń iegeri, Eńbek Eri Ábish Kekilbaevty eske alýǵa arnalǵan «Kemel eldiń kemeńger qalamgeri» atty ádebi-óner keshi boldy.
Oǵan Astana men Almatydan, Batys Qazaqstan men Mańǵystaý oblystarynan qatysýǵa kelgen qonaqtardyń arasynda kemeńger tulǵanyń jary Klara Jumabaeva, uly Dáýlet pen qyzy Sáýlet, memleket jáne qoǵam qairatkerleri Ómirbek Báigeldi, Kenjeǵali Saǵadiev, Zeinolla Alshymbaev, Baqtyqoja Izmuhambetov, Ómirzaq Ozǵanbaev, Májilis depýtaty Abai Tasbolatov, jazýshylar men aqyndar Qajyǵali Muhambetqaliev, Rollan Seisenbaev, Ótegen Oralbaev, Aqushtap Baqtygereeva, Mereke Qulkenov, «Egemen Qazaqstan» respýblikalyq gazeti» AQ basqarma tóraǵasy Darhan Qydyráli, jelmen jarysqan jelaiaq, ardager sportshy Ámin Tuiaqov, kúishi Serjan Shákratov, jyrshy-termeshi Amandyq Kómekov, ánshi Tamara Asar bar.
Elimizdiń ár óńirinen Jaiyq jaǵasyna kelgen qonaqtar aldymen H.Dosmuhamedov atyndaǵy Atyraý memlekettik ýniversitetinde halyq jazýshysy Ábish Kekilbaevtyń ádebi murasyn ǵylymi zertteý ortalyǵynyń ashylýyna qatysty. Ortalyqtyń lentasyn qalamgerdiń jary Klara Jumabaeva men Atyraý oblysynyń ákimi Nurlan Noǵaev qidy.
Ortalyqta jazýshynyń ádebi týyndylary qoiylǵan. Budan keiin «Kemel eldiń kemeńger qalamgeri» atty ádebi-keshinde estelik aitýshylar Ábish Kekilbaevtyń qalamgerlik jáne kemeńgerlik qyrlaryna keńinen toqtaldy. Aldymen sóz alǵan oblys ákimi N.Noǵaev jazýshynyń «Rýhtyń kúshtiligi – ardyń tazalyǵy, sezimniń shynaiylyǵy» degen sózin mysalǵa ala otyryp, el táýelsizdiginiń qalyptasý kezeńindegi kósemdik, kemeńgerlik bolmysyn tanytqanyna toqtaldy.
Kenjeǵali Saǵadievtyń pikirinshe, ol ult perzenti retinde qazaq halqynyń rýhani damýyna aishyqty qoltańbasyn qaldyrdy. Al óner zertteýshisi, kompozitor Ilia Jaqanov «Jazýshynyń sýretkerlik bolmysy zerttelýi qajet» dei kele sheshendik qabiletine birneshe mysaldar keltirdi.
Tanymal jazýshylar Qajyǵali Muhambetqaliev, Aqushtap Baqtygereeva, Mereke Qulkenov, memleket jáne qoǵam qairatkerleri Ómirbek Báigeldi, Baqtyqoja Izmuhambetov, Zeinolla Alshymbaev kemeńger qalamgerdiń adami qasietteri týraly tolǵana áńgimeledi.
«Ábish –uly sýretker, ol álemdegi eń tanymal 100 jazýshynyń tizimine endi» dedi jazýshy Rollan Seisenbaev.
Al «Egemen Qazaqstan» respýblikalyq gazeti» AQ basqarma tóraǵasy Darhan Qydyráli jazýshynyń pýblitsistikasyna toqtaldy.
H.Dosmuhamedov atyndaǵy Atyraý ýniversitetiniń stýdentteri qalamger shyǵarmalarynan úzindiler oqydy. Ádebi-óner keshi barysynda án aityldy, kúi tartyldy.Sonymen birge, Ábish Kekilbaev atyndaǵy shákirtaqy alǵashqy iegerine tapsyryldy.
Joldasbek Shópeǵul, Atyraý
"Egemen Qazaqstan" gazeti
