Foto: Reuters
Sársenbi kúni Vashingtonda AQSh jáne Ýkraina prezidentteriniń kezdesýi ótti. Bul - Zelenskiidiń Resei Ýkrainaǵa basyp kirgeli beri shetelge jasaǵan alǵashqy sapary. Djo Baiden Vladimir Zelenskiidi prezident rezidentsiiasyna kireberiste jyly qarsy aldy, dep habarlaidy Azattyq radiosy.
Kezdesý basynda Baiden Amerika halqy Ýkrainany "maqtanyshpen" qoldaidy jáne onyń "ádiletti álemge" umtylysyn qýattaidy dedi. AQSh prezidenti Reseidiń Ýkrainadaǵy infraqurylymdardy atqylaýyn aiyptap, Máskeý qaqaǵan aiazdy "qarý retinde paidalanýǵa tyrysyp jatyr" dem málimdedi. Ýkrain halqy álemdi "rýhtandyryp jatyr" degen pikirin de jetkizdi.
Zelenskii AQSh prezidentine, Kongress jáne amerikalyqtarǵa Ýkrainaǵa kómegi úshin alǵys bildirdi.
Kelissóz aiaqtalǵannan keiin eki el basshylary ortaq baspasóz jiynyn ótkizdi. "Nastoiashee vremia" arnasy kezdesýden tikelei efirde habar taratty.
Baiden baspasóz jiynynda soǵystyń jalǵasyp jatqanyna 300 kúnnen asqanyn eske saldy. Ol ýkrain halqy Resei basqynshylyǵyna tótep berip keledi jáne AQSh ýkrain halqynyń bostandyq úshin kúresin qoldai beredi dep málimdedi. Baiden osy tusta AQSh-tyń Reseige salǵan sanktsiialary men Ýkrainaǵa áskeri tehnika men qarý-jaraq jetkizgenin jáne qarjylai qoldaǵanyn da atap ótti. Ýkrainany qoldaý arqyly AQSh pen odaqtastary azattyq, demokratiia jáne halyqaralyq quqyqtyń negizgi printsipterine dem beredi dedi.
Baidenniń sózinshe, Resei prezidenti Vladimir Pýtin ázirge beibitshilikke umtylysyn kórsetken joq. Prezident AQSh-tyń Ýkrainaǵa beretin jańa áskeri kómegi týraly da baiandady.
Zelenskii baspasóz jiyny kezinde kezdesýdi "tarihi sát" dep atap, bastalǵanyna 300 kún bolǵan soǵysta AQSh Ýkrainanyń naǵyz áriptesi ári odaqtasy ekenin dáleldedi dedi. Zelenskii sonymen birge qanatty zymyran shabýyldarynan qorǵaýǵa múmkindik beretin Patriot júiesine de toqtaldy. Ýkraina basshysy sonymen qatar aldaǵy jylmen bailanysty "strategiialyq" máseleler, Ýkraina halqyna kómek, sonymen birge basqynshylyqqa kinálilerdi jazalaý máseleleri talqylanǵanyn da atap ótti.
Zelenskii aǵylshyn tilinde Amerika halqyna qaiyryldy. Ol álemge beibitshilik tilep, "tiraniiany" birigip jeńetinimizge senimdimin dedi.
Zelenskiidiń aitýynsha, Ýkraina territoriialyq tutastyq jáne soǵys shyǵynyn óteý máselesine kelgende eshqandai shartqa kónbeidi. Baiden Zelenskiimen kózqarastary kóp jaǵdaida sáikes keletinin jetkizip, Ýkraina aitqan sharttarmen beibit kelisim jasalýy tiis, al onyń kilti soǵystaǵy jeńis dedi.
Ol sonymen birge Pýtinniń "sátsizdikke ushyrap" maqsatyna jete almaǵanyn da atap ótti. Baiden degenmen AQSh Ýkraina suraǵan qarýdyń barlyq túrlerin bere almaitynyn, sebebi muny NATO boiynsha odaqtastary maquldamaitynyn, buǵan qosa Reseimen tikelei teketireske túsýden aýlaq bolý qajettigin atap ótti.
"Pýtinge ne aitqyńyz keledi?" degen suraqqa Zelenskii "qazir álemge ne aitqysy keletinin Pýtinniń ózi oilanýy tiis, ol ózin órkenietti adamdar qatarynan shyǵaryp tastady" dedi.
Baidenmen kezdeskennen keiin Zelenskii AQSh Kongresinde sóz sóiledi.
