8 qazanda Aq úi Prezident Donald Trampqa impichment jariialaý protsedýrasyn zertteý boiynsha demokrattarmen áriptestik ornatýdan bas tartty.
Aq úi zańgeri Pet Chipollonnyń ókilder palatasyna joldaǵan málimdemesinde "prezident Tramp pen onyń ákimshiligi Konstitýtsiiaǵa qaishy birjaqty zertteýge aralasqysy kelmeidi" dep jazylǵan.
Aq úidiń baspasóz hatshysy Stefani Grishem prezident ákimshiligi "birjaqty saiasi spektaklge qatyspaidy" dep málimdedi. Aq úi ókilderi 2016 jylǵy prezident sailaýynyń qorytyndysyn joqqa shyǵarý úshin demokrattar azamattyq erkindik pen bilik bólinisin buzyp jatyr dep aiyptady.
"Prezident eshteńeni búldirgen joq. Demokrattar muny biledi" dedi Grishem.
Buǵan deiin AQSh memlekettik departamenti AQSh-tyń Eýropa Odaǵyndaǵy ókili Gordon Sondlandqa ókilder palatasynyń tyńdaýyna barýǵa tyiym salǵan. Sondlandtyń ózi tyńdaýǵa qatysý úshin Vashingtonǵa arnaiy ushyp barǵan.
Ókilder palatasynyń spikeri, demokrat Nensi Pelosi Aq úidiń zertteýge qatysýdan bas tartqanyna prezident Donald Tramp jaýap beredi dedi. Ol "prezidenttiń qyzmettik ókiletin asyra paidalanǵanyn Amerika halqynan jasyrýǵa talpyný zańǵa qaishy áreket" dep baǵalady.
Daý Tramptyń 25 shildede Ýkraina prezidenti Vladimir Zelenskiimen bolǵan áńgimesinen soń týǵan. Amerikalyq basylymdar Tramptyń Zelenskiidi 2020 jylǵy sailaýda óziniń bas qarsylasy bolatyn Djo Baidenniń ústinen jemqorlyq daýy boiynsha is qozǵaýǵa májbúrlemek bolǵanyn jazdy. Synshylar Tramp "qyzmettik ókiletin asyra paidalanyp, yqtimal qarsylasyna kompromat tabýǵa tyrysty" dep aiyptady. Donald Tramp bul aiyptaýlardy joqqa shyǵardy.
Tramp pen Zelenskii arasyndaǵy áńgime belgili bolǵannan keiin AQSh ókilder palatasyndaǵy demokrattar Trampqa "bergen sertin buzǵany úshin" impichment jariialaý protsesin bastaǵan. 24 qyrkúiekte ókilder palatasynyń spikeri Nensi Pelosi "Tramp óziniń sertin buzdy, ulttyq qaýipsizdigimiz ben sailaý institýtyn satyp ketti" degen. Donald Tramp bul protsesti "farsqa" teńedi.
