Foto: videodan skrinshot
Qazaqstannyń halyq ártisi, aty ańyzǵa ainalǵan ánshi Bibigúl Tólegenovny Air Astana qyzmetkeri bortqa kirgizbei ári dóreki sóilegen, dep habarlaidy Azattyq Rýhy .
Bul oqiǵaǵa bailanysty Air Astana áýe kompaniiasynyń prezidenti Piter Fosterge arnalǵan ashyq hat áleýmettik jelide jariialandy.
Elimizdegi iri áýe kompaniiasynyń qyzmetkeri ushaq esigine deiin arbaǵa otyryp kelgen 95 jastaǵy Bibigúl Tólegenovany basqa jolaýshylarǵa kedergi keltiresiz degen jeleýmen bortqa ótkizbegen.
«Bibigúl Tólegenovany shyǵaryp salýshy adam ony bortqa deiin arbaǵa otyrǵyzyp alyp kelgen. Biraq qyzmetker olardy dereý toqtatyp arbaǵa tańylǵan jolaýshylar ushaqqa ne eń birinshi kelýi kerek ekenin, al, birinshi kelmedi me sońǵy jolaýshy kirip ketkenshe kútýi keregin aitty... Bibigúl Ahmetqyzy arbamen tek ushaqtyń kirebirisine deiin ǵana baryp, ary qarai eshkimge kedergi keltirmei ornyna jaiǵasqysy keldi. Onyń ústine sol ýaqytta topyrlaǵan jolaýshy da bolmady. Arbamen op-ońai ári tez ótip ketýge múmkindik boldy. Air Astana qyzmetkerine Bibigúl Tólegenova arbada uzaq ýaqyt otyryp qalsa, omyrtqasy qatty aýyratynyn aityp, salonǵa erterek ótkizip jiberýdi ótindik. Tipti onyń jasy 95-ke kelgenin, halqynyń qurmetti azamaty ekenin de aittyq», - deidi jeli qoldanýshysy.
Aitýynsha, áýe kompaniiasynyń qyzmetkeri aty ańyzǵa ainalǵan qazaq ánshisine eshqaidai jeńildik bolmaitynyn óte dóreki túrde eskertken. Jeli qoldanýshysy qyzmetkerdiń úlken kisige, qazaqtyń atyn álemge tanytqan azamatqa degen qarapaiym qurmettiń joqtyǵyna narazy boldy.
Áleýmettik jelidegi osy jazbanyń astyna pikir jazǵan áýe kompaniiasynyń resmi paraqshasy osyndai oqiǵa oryn alǵanyn rastady.
«Bibigúl Ahmetqyzy Tólegenovaǵa degen qurmetimiz erekshe! Air Astana áýe kompaniiasy úshin qaýipsizdik basty orynda. Áýe qaýipsizdiginiń halyqaralyq erejelerine sai, arbada otyrǵan jolaýshylar ushaqqa eń birinshi bolyp nemese eń sońynda minedi. Iaǵni, osy ereje jolaýshylardyń bári úshin yńǵaily, sondai-aq, terminaldan evakýatsiialaý erejelerine sai. Bizdiń qolymyzdaǵy aqparatqa súiensek, Qazaqstannyń halyq ártisi Bibigúl Tólegenova men onyń qyzy jolaýshylar ushaqqa mine bastaǵanda kelgnen. Sondyqtan, áýe kompaniiasynyń agenti jolaýshylar minip alǵansha kúte turyńyzdar degen. Áýe kompaniiasy osy oqiǵanyń oryn alǵanyna qatty ókinedi jáne qyzmet sapasyn jaqsartý úshin qosymsha tekseris júrgizedi», - dep jazǵan kompaniia.
