Qazaqstannyń Syrtqy ister ministrligi Germaniiada qaza tapqan burynǵy sýdia Aigúl Sailybaevanyń ólimine qatysty tergeý isiniń qazirgi barysy týraly málimet berdi, dep habarlaidy Ult.kz NewTimes.kz saityna silteme jasap.
Vedomstvonyń habarlaýynsha, Qazaqstannyń Germaniiadaǵy elshiligi bul másele boiynsha Germaniia Syrtqy ister ministrligi ókilderimen turaqty túrde kezdesýler ótkizip keledi. Sonymen qatar Frankfýrt-na-Mainedegi Bas konsýldyq Gessen federaldyq jeriniń quzyrly organdarymen bailanys ornatyp, qajetti jumystardy jalǵastyrýda.
SIM málimetine sáikes, Qazaqstan quqyq qorǵaý organdarynyń ekstraditsiia týraly suraýy negizinde Resei IIM Máskeý qalasy boiynsha qylmystyq izdestirý basqarmasynyń qyzmetkerleri Aleksandr Dontsov pen Natalia Dontsovany ustaǵan. Buǵan deiin olar Germaniianyń quqyq qorǵaý organdary tarapynan halyqaralyq izdeýge, al Qazaqstan IIM arqyly memleketaralyq izdeýge jariialanǵan bolatyn.
Alaida kúdiktiler Resei azamattary bolǵandyqtan, olardy Qazaqstanǵa berý múmkin emes ekeni aldyn ala habarlanǵan.
«Qazirgi ýaqytta Resei tarapy Qazaqstannan óz aýmaǵynda qylmystyq is qozǵaý týraly resmi suraý kútýde. Bul tergeý áreketterin júrgizýge quqyqtyq negiz bolady», – delingen SIM jaýabynda.
Sondai-aq marqumnyń týysy B.Sailybaevtyń Resei Federatsiiasy Tergeý komitetine ótinish joldaý týraly ótinishinen keiin Qazaqstan elshiligi 2026 jylǵy 5 mamyrda Resei SIM-ine resmi nota jibergen.
Qazaqstandyq diplomattar Resei tarapymen júrgizilgen kelissózder barysynda bul máseleni jedel qaraýdyń mańyzdylyǵyn atap ótip, buryn joldanǵan notaǵa tezirek jaýap beriledi degen úmit bildirgen. Qazir bul is Qazaqstannyń Reseidegi elshiliginiń turaqty baqylaýynda.
Sonymen qatar Qazaqstannyń Germaniiadaǵy diplomatiialyq ókildigi Aigúl Sailybaevanyń jaqyndarymen turaqty bailanys ornatqan.
Eske salaiyq, buryn Qazaqstanda sýdia bolyp qyzmet atqarǵan Aigúl Sailybaevanyń denesi Germaniiadaǵy Erlahe kóli mańynan tabylǵan. Ol qaitys bolǵan kezde júktiliktiń 24-aptasynda bolǵan. Sarapshylar áieldiń denesinen kóptegen pyshaq jaraqattaryn anyqtap, qylmystyń erekshe qatygezdikpen jasalǵanyn málimdegen.
Buǵan deiin Sailybaevany óltirýge kúdiktelgen Dontsovtar Máskeýde turyp jatqanyn jazǵan bolatynbyz.
