قازاقستاننىڭ سىرتقى ٸستەر مينيسترلٸگٸ گەرمانييادا قازا تاپقان بۇرىنعى سۋديا ايگٷل سايلىباەۆانىڭ ٶلٸمٸنە قاتىستى تەرگەۋ ٸسٸنٸڭ قازٸرگٸ بارىسى تۋرالى مەلٸمەت بەردٸ, دەپ حابارلايدى Ult.kz NewTimes.kz سايتىنا سٸلتەمە جاساپ.
ۆەدومستۆونىڭ حابارلاۋىنشا, قازاقستاننىڭ گەرمانيياداعى ەلشٸلٸگٸ بۇل مەسەلە بويىنشا گەرمانييا سىرتقى ٸستەر مينيسترلٸگٸ ٶكٸلدەرٸمەن تۇراقتى تٷردە كەزدەسۋلەر ٶتكٸزٸپ كەلەدٸ. سونىمەن قاتار فرانكفۋرت-نا-ماينەدەگٸ باس كونسۋلدىق گەسسەن فەدەرالدىق جەرٸنٸڭ قۇزىرلى ورگاندارىمەن بايلانىس ورناتىپ, قاجەتتٸ جۇمىستاردى جالعاستىرۋدا.
سٸم مەلٸمەتٸنە سەيكەس, قازاقستان قۇقىق قورعاۋ ورگاندارىنىڭ ەكستراديتسييا تۋرالى سۇراۋى نەگٸزٸندە رەسەي ٸٸم مەسكەۋ قالاسى بويىنشا قىلمىستىق ٸزدەستٸرۋ باسقارماسىنىڭ قىزمەتكەرلەرٸ الەكساندر دونتسوۆ پەن ناتاليا دونتسوۆانى ۇستاعان. بۇعان دەيٸن ولار گەرمانييانىڭ قۇقىق قورعاۋ ورگاندارى تاراپىنان حالىقارالىق ٸزدەۋگە, ال قازاقستان ٸٸم ارقىلى مەملەكەتارالىق ٸزدەۋگە جارييالانعان بولاتىن.
الايدا كٷدٸكتٸلەر رەسەي ازاماتتارى بولعاندىقتان, ولاردى قازاقستانعا بەرۋ مٷمكٸن ەمەس ەكەنٸ الدىن الا حابارلانعان.
«قازٸرگٸ ۋاقىتتا رەسەي تاراپى قازاقستاننان ٶز اۋماعىندا قىلمىستىق ٸس قوزعاۋ تۋرالى رەسمي سۇراۋ كٷتۋدە. بۇل تەرگەۋ ەرەكەتتەرٸن جٷرگٸزۋگە قۇقىقتىق نەگٸز بولادى», – دەلٸنگەن سٸم جاۋابىندا.
سونداي-اق مارقۇمنىڭ تۋىسى ب.سايلىباەۆتىڭ رەسەي فەدەراتسيياسى تەرگەۋ كوميتەتٸنە ٶتٸنٸش جولداۋ تۋرالى ٶتٸنٸشٸنەن كەيٸن قازاقستان ەلشٸلٸگٸ 2026 جىلعى 5 مامىردا رەسەي سٸم-ٸنە رەسمي نوتا جٸبەرگەن.
قازاقستاندىق ديپلوماتتار رەسەي تاراپىمەن جٷرگٸزٸلگەن كەلٸسسٶزدەر بارىسىندا بۇل مەسەلەنٸ جەدەل قاراۋدىڭ ماڭىزدىلىعىن اتاپ ٶتٸپ, بۇرىن جولدانعان نوتاعا تەزٸرەك جاۋاپ بەرٸلەدٸ دەگەن ٷمٸت بٸلدٸرگەن. قازٸر بۇل ٸس قازاقستاننىڭ رەسەيدەگٸ ەلشٸلٸگٸنٸڭ تۇراقتى باقىلاۋىندا.
سونىمەن قاتار قازاقستاننىڭ گەرمانيياداعى ديپلوماتييالىق ٶكٸلدٸگٸ ايگٷل سايلىباەۆانىڭ جاقىندارىمەن تۇراقتى بايلانىس ورناتقان.
ەسكە سالايىق, بۇرىن قازاقستاندا سۋديا بولىپ قىزمەت اتقارعان ايگٷل سايلىباەۆانىڭ دەنەسٸ گەرمانيياداعى ەرلاحە كٶلٸ ماڭىنان تابىلعان. ول قايتىس بولعان كەزدە جٷكتٸلٸكتٸڭ 24-اپتاسىندا بولعان. ساراپشىلار ەيەلدٸڭ دەنەسٸنەن كٶپتەگەن پىشاق جاراقاتتارىن انىقتاپ, قىلمىستىڭ ەرەكشە قاتىگەزدٸكپەن جاسالعانىن مەلٸمدەگەن.
بۇعان دەيٸن سايلىباەۆانى ٶلتٸرۋگە كٷدٸكتەلگەن دونتسوۆتار مەسكەۋدە تۇرىپ جاتقانىن جازعان بولاتىنبىز.
