«NeMolchi» qoǵamdyq qorynyń jetekshisi Dina Tańsári Natasha Qalymbetovaǵa qatysty qoǵamda úlken rezonans týdyrǵan oqiǵa boiynsha jańa málimetterdi jariialady, dep habarlaidy ult.kz Politico.kz saityna siltep.
Eske salaiyq, Natashanyń taǵdyry qoǵamdy dúr silkindirgen edi. Mektep oqyp júrgen kezinde ony aýyldyń tórt jigiti zorlaǵan. Saldarynan tórteýiniń bireýinen aiaǵy aýyr bolyp, ol qyz balany dúniege ákelgen. Arada 30 jyldan astam ýaqyt ótken soń Natasha qyzyn tabýǵa úmittenip júrgen bolatyn.
«Búgin biz qyzdyń tabylǵan bolýy múmkin ekenin habarladyq. Qolymyzdaǵy derekter onyń shynymen Natashanyń qyzy ekenin kórsetip otyr. Oqiǵanyń keńinen taralýynyń arqasynda biz Natashanyń qyzy bolýy múmkin adam týraly kóptegen málimet aldyq. Barlyq aqparatty muqiiat salystyryp, tekserdik. Sol túni bizdiń komanda da, Natasha da, advokattar da kóz ilmedi. Barlyq belgiler boiynsha bul – dál sol qyz. Biz onyń bala kezdegi fotosýretin taptyq. Natasha ony birden tanydy. Bárimiz qatty tolqydyq. Natasha «Bul – meniń qyzym ekenine kúmánim joq» dedi», – dep bólisti Dina Tańsári.
Buǵan deiin Natasha qyzyn AQSh azamattary asyrap alǵanyn aitqan edi. Sondyqtan ol qazirgi tańda Amerika Qurama Shtattarynda turyp jatýy múmkin.
Sonymen qatar, qor jetekshisi qazaqstandyqtarǵa úndeý jasap, qyzdy izdeý jumystaryn toqtata turýdy jáne onyń otbasyn alańdatpaýdy surady.
«Barshańyzdan úlken ótinishimiz bar. Bul jaǵdai Natasha úshin de, onyń qyzy úshin de, bárimiz úshin de óte aýyr. Sondyqtan izdeýdi osy jerden toqtataiyq. Qazirgi aqparat biz úshin jetkilikti. Qyzdyń otbasyna túsinistikpen qarap, olardyń jeke ómirine qurmetpen qaraiyq. AQSh-taǵy qoǵamnyń kózqarasy men mentaliteti ózgeshe. Aqparattyń jappai taralýy men qyzdy izdeýge bailanysty týyndaǵan jaǵdai Natashany da alańdatyp otyr. Sondyqtan adamdardyń sezimine qurmetpen qaraǵanymyz jón», – dedi ol.
Natasha Qalymbetova jyldar boiy ajyrap qalǵan qyzymen qaita qaýyshýdy ǵana emes, ózine qarsy qylmys jasaǵan adamdardyń zań aldynda jaýap bergenin de qalaidy.
