QR Prezidentiniń kómekshisi — Prezident Ákimshiligi ótinishterdi qaraýdy baqylaý bóliminiń meńgerýshisi Aida Balaeva tótenshe jaǵdai kezinde qalai keńes alýǵa bolatynyn túsindirdi, dep habarlaidy "Ult aqparat".
«Tótenshe jaǵdai rejiminde qazaqstandyqtardyń kópshiligin zańgerlik kómek, jumyspen qamtý, materialdyq ótemaqy alý syndy keń aýqymdy qamtityn máselelerge qatysty keńesti qajet etedi. Bul saýaldardyń jaýabyn memlekettik organdardyń is júzinde táýlik boiy jumys isteitin koll-ortalyqtaryna júginý arqyly alýǵa bolady. Máselen,sońǵy birneshe táýlikte Ádilet ministrliginiń ǵana koll-ortalyǵyna 3 myńnan astam azamat júgindi. Adamdardyń ózdiginen saýatty keńes alý úshin mamandarǵa bailanysýy, sol arqyly qatelikterdiń nemese bireýlerdiń astyrtyn áreketine qurban bolmaýy qýantady. Qalǵan azamattarymyzdyń da memlekettik organdar konsýltatsiialyq kómek berýge daiyn ekendigin qaperde ustaýy barynsha mańyzdy», - dep jazdy Aida Balaeva Facebook paraqshasynda.
Onyń atap ótýinshe, qazirgi jaǵdaida halyq tarabynan túrli sipattaǵy máseleler týyndaidy.
«Kóptegen qazaqstandyqtar abyrjý, alańdaý jáne sasqalaqtaý jaǵdaiynda júrgendigi tań qalarlyq jait emes. Biraq, barlyq memlekettik organdar kúsheitilgen rejimde jumys istep jatyr. Eń bastysy memleket jariia etken sharalar qazaqstandyqtardyń kúrdeli jaǵdaidan myqty ári uiymshyl bolyp shyǵýyna kómektesedi. #BizBirgemiz», - dedi ol.
