Búgin Parlament Senatynyń jalpy otyrysynda Aqparat jáne qoǵamdyq damý ministri Aida Balaeva sheteldegi qandastardy qoldaý sharalary týraly aitty, dep habarlaidy QazAqparat.
«Qandastardy, sheteldegi otandastarymyzdy qoldaý – memlekettik saiasattyń basym baǵyttarynyń biri. Atajurtqa oralǵan qandastarymyz kóp. Bul maqsatta júieli jumystar legi júrgizilip jatyr. 2018 jyly «Otandastar» qory quryldy. Qor qazirgi tańda belsendi túrde jumysyn jalǵastyrýda», - dedi Aida Balaeva Parlament Senatynyń otyrysynda.
Ministr keiingi bir jarym jyldyń ishinde qandastarymyzdyń qoldaý maqsatynda 3 myńǵa tarta shara ótkizilgenin jetkizdi.
«Balalar lageri uiymdastyrylyp, qazaq tilin úirený kýrstary bastaldy. Ádistemelik quraldar ázirlendi. Álemdegi 12 memlekettiń 23 qalasynda qazaq tilin úiretýge arnalǵan 31 onlain-synyp ashyldy. Olar qazir belsendi jumys júrgizip jatyr. Sheteldegi 250 qazaq ortalyǵymen yntymaqtastyq ornatyldy. Bul jumys júieli túrde jalǵasyn tabady», - dedi Aida Balaeva.
Budan bólek ministr sheteldegi qandastardy qoldaýǵa baǵyttalǵan 2021-2025 jyldarǵa arnalǵan baǵdarlama ázirlengenin jetkizdi.
Óz kezeginde Parlament Senatynyń tóraǵasy Máýlen Áshimbaev qandastardyń máselesin erekshe nazar aýdarý kerektigin aityp ótti.
«Azamattyq alý úshin qujattardyń tizimin azaitý jáne osy rásimdi jeńildetý máselesi bar. Búgingi kúni qandastarymyz bul jumystarmen basy qatyp jarty, tipti bir jylǵa deiin júredi. Ana jaqtan, myna jaqtan qaǵazdardy jinaý kerek dep, áýre-sarsańǵa túsedi. Qandastarymyz osy rásimdi jeńildetý máselesin jii kóteredi. Bul jerde de Úkimet tarapynan bir jumystardyń bastalǵanyn bilemiz. Naqty nátije bolar dep úmittenemiz», - dedi ol.
