QR Aqparat jáne qoǵamdyq damý ministri Aida Balaeva qazaqstandyqtardy halyqaralyq otbasy kúnimen quttyqtady, dep habarlaidy "Ult aqparat".
«Búgin - halyqaralyq otbasy kúni. Otbasy – barshamyz úshin qasterli de qadirli uǵym. Rasynda árbir otbasy – tutas qoǵamnyń ainasy. Biraq, otbasynyń irgesin bekitip, qabyrǵasyn qataitý – ómirge urpaq ákelý, mol tabys tabý qaǵidalarymen ǵana shektele me?! Meniń oiymsha, otbasynyń beriktigi – eń aldymen ondaǵy ózara syilastyq pen qurmetke, biik rýhani deńgei men tárbiege bailanysty. Bizdiń qai-qaisymyz ómirlik daǵdyny, minezimizdi, basqalarmen bailanys mádenietin otbasyndaǵy tárbieden qalyptastyramyz. Áke-shesheniń bir-birine degen qurmeti, ainalaǵa degen qarym-qatynasy – bala úshin eń birinshi ómirlik úlgi. Sonyń ishinde, ananyń yqpaly men róli ásirese erekshe dep sanaimyn. Áieldiń ata-anaǵa degen izeti, jubaiyna qurmeti, balasyna degen meiirimi, ózine degen senimi – barlyǵy da bala tárbiesindegi negizgi alǵyshart. Balanyń tyńdap oi túzeitin de, qarap boi túzeitin de úlgisi osynda jatyr» dep jazdy Aida Balaeva Facebook paraqshasynda.
Aqparat jáne qoǵamdyq damý ministri «Uiada ne kórseń – ushqanda sony ilesiń» degen halyq danalyǵyn eske saldy. Iaǵni, otbasylyq tárbie - kúndelikti jaýapkershilik.
Bunyń barlyǵy da - bizdiń halyqtyń ózine tán otbasylyq tárbie institýtynda bar dúnie. Ol ǵasyrdan ǵasyrǵa sozylyp, urpaqtan urpaqqa sabaqtasyp keledi.
Sebebi bul ulttyq kodymyzǵa jazylǵan rýhani qundylyqtar.
«Biz keshe ǵana jyldaǵy dástúrmen kezekti «Mereili otbasy» ulttyq konkýrsyn bastadyq. Bul shyn máninde naǵyz halyqtyq qoldaýǵa ie ulttyq jobaǵa ainaldy. Búginde keibir BAQ elimizde otbasylyq qundylyqtardyń ózgergenin jazyp jatady. Degenmen shyn máninde bizdiń qoǵamda úlgi bolatyn otbasylar óte kóp. El Táýelsizdiginiń 30 jyly ishinde uiymdastyrylatyn osyndai ártúrli jobalar men baiqaýlar bizge osyny kórsetip keledi. Muraty biik memleket te, birligi berik qoǵam da – eń aldymen birligi zor, berekesi mol otbasydan quralady. Osyndai otbasylar – erteńgi el basqaratyn ziialy azamatty da tárbieleidi, básekege qabiletti qoǵamdy da qalyptastyrady. Sondyqtan Otbasy merekesi barshańyzǵa qutty bolsyn! Denderińizge saýlyq, baiandy baqyt pen berekeli tatýlyq tileimin! Otbasylaryńyz aman bolsyn!» dep túiindedi sózin ministr.
