قر اقپارات جەنە قوعامدىق دامۋ مينيسترٸ ايدا بالاەۆا قازاقستاندىقتاردى حالىقارالىق وتباسى كٷنٸمەن قۇتتىقتادى, دەپ حابارلايدى "ۇلت اقپارات".
«بٷگٸن - حالىقارالىق وتباسى كٷنٸ. وتباسى – بارشامىز ٷشٸن قاستەرلٸ دە قادٸرلٸ ۇعىم. راسىندا ەربٸر وتباسى – تۇتاس قوعامنىڭ ايناسى. بٸراق, وتباسىنىڭ ٸرگەسٸن بەكٸتٸپ, قابىرعاسىن قاتايتۋ – ٶمٸرگە ۇرپاق ەكەلۋ, مول تابىس تابۋ قاعيدالارىمەن عانا شەكتەلە مە?! مەنٸڭ ويىمشا, وتباسىنىڭ بەرٸكتٸگٸ – ەڭ الدىمەن ونداعى ٶزارا سىيلاستىق پەن قۇرمەتكە, بيٸك رۋحاني دەڭگەي مەن تەربيەگە بايلانىستى. بٸزدٸڭ قاي-قايسىمىز ٶمٸرلٸك داعدىنى, مٸنەزٸمٸزدٸ, باسقالارمەن بايلانىس مەدەنيەتٸن وتباسىنداعى تەربيەدەن قالىپتاستىرامىز. ەكە-شەشەنٸڭ بٸر-بٸرٸنە دەگەن قۇرمەتٸ, اينالاعا دەگەن قارىم-قاتىناسى – بالا ٷشٸن ەڭ بٸرٸنشٸ ٶمٸرلٸك ٷلگٸ. سونىڭ ٸشٸندە, انانىڭ ىقپالى مەن رٶلٸ ەسٸرەسە ەرەكشە دەپ سانايمىن. ەيەلدٸڭ اتا-اناعا دەگەن ٸزەتٸ, جۇبايىنا قۇرمەتٸ, بالاسىنا دەگەن مەيٸرٸمٸ, ٶزٸنە دەگەن سەنٸمٸ – بارلىعى دا بالا تەربيەسٸندەگٸ نەگٸزگٸ العىشارت. بالانىڭ تىڭداپ وي تٷزەيتٸن دە, قاراپ بوي تٷزەيتٸن دە ٷلگٸسٸ وسىندا جاتىر» دەپ جازدى ايدا بالاەۆا Facebook پاراقشاسىندا.
اقپارات جەنە قوعامدىق دامۋ مينيسترٸ «ۇيادا نە كٶرسەڭ – ۇشقاندا سونى ٸلەسٸڭ» دەگەن حالىق دانالىعىن ەسكە سالدى. ياعني, وتباسىلىق تەربيە - كٷندەلٸكتٸ جاۋاپكەرشٸلٸك.
بۇنىڭ بارلىعى دا - بٸزدٸڭ حالىقتىڭ ٶزٸنە تەن وتباسىلىق تەربيە ينستيتۋتىندا بار دٷنيە. ول عاسىردان عاسىرعا سوزىلىپ, ۇرپاقتان ۇرپاققا ساباقتاسىپ كەلەدٸ.
سەبەبٸ بۇل ۇلتتىق كودىمىزعا جازىلعان رۋحاني قۇندىلىقتار.
«بٸز كەشە عانا جىلداعى دەستٷرمەن كەزەكتٸ «مەرەيلٸ وتباسى» ۇلتتىق كونكۋرسىن باستادىق. بۇل شىن مەنٸندە ناعىز حالىقتىق قولداۋعا يە ۇلتتىق جوباعا اينالدى. بٷگٸندە كەيبٸر باق ەلٸمٸزدە وتباسىلىق قۇندىلىقتاردىڭ ٶزگەرگەنٸن جازىپ جاتادى. دەگەنمەن شىن مەنٸندە بٸزدٸڭ قوعامدا ٷلگٸ بولاتىن وتباسىلار ٶتە كٶپ. ەل تەۋەلسٸزدٸگٸنٸڭ 30 جىلى ٸشٸندە ۇيىمداستىرىلاتىن وسىنداي ەرتٷرلٸ جوبالار مەن بايقاۋلار بٸزگە وسىنى كٶرسەتٸپ كەلەدٸ. مۇراتى بيٸك مەملەكەت تە, بٸرلٸگٸ بەرٸك قوعام دا – ەڭ الدىمەن بٸرلٸگٸ زور, بەرەكەسٸ مول وتباسىدان قۇرالادى. وسىنداي وتباسىلار – ەرتەڭگٸ ەل باسقاراتىن زييالى ازاماتتى دا تەربيەلەيدٸ, بەسەكەگە قابٸلەتتٸ قوعامدى دا قالىپتاستىرادى. سوندىقتان وتباسى مەرەكەسٸ بارشاڭىزعا قۇتتى بولسىن! دەندەرٸڭٸزگە ساۋلىق, باياندى باقىت پەن بەرەكەلٸ تاتۋلىق تٸلەيمٸن! وتباسىلارىڭىز امان بولسىن!» دەپ تٷيٸندەدٸ سٶزٸن مينيستر.
