Kez kelgen jumystyń jemisti bolýy tereń ǵylymi negiz ben sol bastamaǵa shyn janashyr mamanǵa bailanysty. Bul týraly Aqordada ótken Qoǵamdyq sanany jańǵyrtý jónindegi ulttyq komissiia otyrysynda QR Aqparat jáne qoǵamdyq damý ministri Aida Balaeva aitty, dep habarlaidy QazAqparat.
«Kez kelgen jumystyń jemisti bolýy tereń ǵylymi negiz ben sol bastamaǵa shyn janashyr mamanǵa bailanysty. Sondyqtan, bul máselelerge úlken kóńil bólinedi. Osyǵan orai, ministrlik janynan arnaiy Qoǵamdyq damý institýtynyń qyzmeti jolǵa qoiyldy. Oǵan baǵdarlamaǵa ǵylymi-saraptamalyq jetekshilik etý mindetimen qatar, óńirlik keńselerdegi mamandarǵa ádistemelik-metodologiialyq kómek kórsetý jumysy júktelgen», - dedi Aida Balaeva.
Ministrdiń atap ótýinshe, osy jyldyń ózinde institýt kúshimen 26 ǵylymi is-shara, 30 áleýmettik zertteý, 5 saraptamalyq baiandama daiyndalyp, jaýapty memlekettik organdarǵa usynyldy. Ólkelerde 13 praktikalyq seminarlar men 30-dan astam vebinarlar ótkizilip, «Rýhani jańǵyrýmen» ainalysatyn 500 maman bilimin shyńdady.
«Eń bastysy – Elbasy atap kórsetken rýhani jańǵyrýdyń negizgi qundylyqtary túsindirilip, kóptegen is-sharalardyń tujyrymdamasy ózgerdi», - dedi ol.
Eske sala keteiik, Memlekettik hatshy Qyrymbek Kósherbaevtyń tóraǵalyǵymen ótken komissiia otyrysynda «Rýhani jańǵyrý» baǵdarlamasyn odan ári tereńdetip Ulttyq jańǵyrý kezeńine ótkizýdiń arnaiy Jol kartasyn jasaý qajet degen sheshim qabyldandy. Bul qujat asa mańyzdy ulttyq joba retinde júrgiziledi.
Ulttyq jańǵyrý jobasynyń eń basty máni – Ulttyń básekege qabilettiligin arttyrý. Bul – ulttyq jańǵyrýdyń strategiialyq maqsaty bolyp qalady. Jol kartasynda Memlekettik til mártebesin arttyrý, Bilim jáne ǵylymdy damytý, Joǵary ulttyq jáne jalpyadamzattyq qundylyqtar negizinde rýhani-adamgershilik jáne patriottyq tárbie berý, Eńbek adamyn qalyptastyrý, Aýyldy túletý siiaqty t.b keshendi is-sharalar qamtylady. Memlekettik hatshy otyrysty qorytyndylai kele, «Rýhani jańǵyrý» baǵdarlamasynyń basym baǵyttary boiynsha jumysty odan ári jandandyrý boiynsha naqty tapsyrmalar berdi.
