Foto: Gov.kz
Búgin Qazaqstanda Ulttyq basylym kúni atap ótilýde, dep habarlaidy Ult.kz.
Aitýly data otandyq merzimdi baspasóz tarihynyń bastaýy sanalatyn «Qazaq» gazetiniń alǵashqy sany jaryq kórgen kúnmen tuspa-tus keledi.
QR Premer-ministriniń orynbasary – Mádeniet jáne aqparat ministri Aida Balaeva bul kúnniń mańyzdylyǵyna toqtalyp, ulttyq basylymdardyń qoǵamdaǵy róli erekshe ekenin atap ótti. Onyń aitýynsha, 1913 jylǵy 2 aqpanda jaryq kórgen «Qazaq» gazeti qazaq halqynyń birligin nyǵaityp, eldik sananyń qalyptasýyna zor úles qosty. Sodan beri gazetter men jýrnaldar memleket pen azamattar arasyndaǵy senimdi kúsheitip, ashyq qoǵam qurýǵa qyzmet etip keledi.
Ministr qazirgi tańda qazaqstandyq basylymdar aǵa býyn qalyptastyrǵan igi dástúrdi laiyqty jalǵastyryp otyrǵanyn aitty. Memleket basshysy jaqynda «Turkistan» gazetine bergen suhbatynda ulttyq baspasózdiń «renessans kezeńine» qadam basqanyn atap ótken bolatyn.
Sondai-aq, internet pen tsifrlyq tehnologiialardyń damýy ulttyq basylymdardyń aýditoriiasyn keńeitip, olardyń eldiń media keńistigindegi ornyn nyǵaita túskeni aityldy. Ulttyq basylymdardy qoldaý Mádeniet jáne aqparat ministrligi qyzmetiniń basym baǵyttarynyń biri bolyp qala beredi.
Osy oraida Aida Balaeva salada eńbek etip júrgen barsha jýrnalister men media mamandardy kásibi merekemen quttyqtap, eldegi reformalar men mańyzdy bastamalardy halyqqa jetkizýdegi eńbekteri úshin alǵys bildirdi. Ministr shyǵarmashylyq shabyt, sarqylmas kúsh-qýat jáne tolaiym tabys tiledi.
