Foto: Premierministr.kz
QR Mádeniet jáne aqparat ministri Aida Balaeva Halyqaralyq balalardy qorǵaý kúni qarsańynda arnaiy beineúndeý joldap, «Qazaqstan balalary» ulttyq naýqanynyń bastalǵanyn málimdedi, dep habarlaidy Ult.kz.
Ministr óz sózinde Memleket basshysynyń tapsyrmasymen «Otbasy – tárbie bastaýy!» uranymen onkúndik bastalǵanyn jáne otbasynyń bala tárbiesindegi sheshýshi rólin atap ótti. Bala tárbiesi men bilim berý salasynda memleket pen ata-ananyń ortaq jaýapkershiliginiń mańyzdylyǵyn erekshe atap ótken ministr, azamattardyń kópshiligi otbasylyq qundylyqtardy óz ómirlerindegi basty basymdyq retinde kóretinin jetkizdi.
Sonymen qatar, beineúndeýde balalardyń qaýipsizdigi men ál-aýqatyn qamtamasyz etý baǵytyndaǵy naqty jetistikter men bastamalar aityldy. Onyń ishinde:
-
Balalarǵa qatysty seksýaldyq zorlyq-zombylyq oqiǵalaryn qamtityn 50-ge jýyq qylmystyq is qaralǵan;
-
700-den astam áiel men balaǵa shuǵyl kómek kórsetilgen;
-
«Salamatty Qazaqstan» poiyzy arqyly 100 myńnan astam azamatqa meditsinalyq kómek kórsetilgen;
-
Áleýmettik osal otbasylarǵa, kópbalaly analar men múmkindigi shekteýli balalarǵa erekshe kóńil bólingen.
Aida Balaeva Úkimet ázirlep jatqan «Qazaqstan balalary» biryńǵai baǵdarlamasynyń balalar máselesin sheshýge baǵyttalǵan zamanaýi ulttyq júie bolatynyn atap ótti. Sonymen qatar, ministrlik iske qosqan «Ata-ana akademiiasy» jobasy aiasynda onlain platforma jaqyn arada iske qosylatynyn habarlady.
«Ár bala tek óz úiinde ǵana emes, qoǵamda da qamqorlyq pen súiispenshilikke bólenýi tiis. Baqytty ári deni saý urpaq – elimizdiń basty maqtanyshy jáne memleketimizdiń órkendeýiniń kórsetkishi», – dedi Aida Balaeva óz úndeýinde.
Ministr barsha ata-analardy balalardyń qyzyǵýshylyqtary men qajettilikterine kóbirek kóńil bólýge shaqyryp, otbasylarǵa baqyt pen bereke tiledi.
