Elimizdiń joǵary oqý oryndaryndaǵy jýrnalistika fakýltetteriniń oqý baǵdarlamalary zerdelenedi. Bul týraly QR Aqparat jáne qoǵamdyq damý ministri Aida Balaeva inbusiness.kz saityna bergen suhbatynda aitty, dep habarlaidy QazAqparat.
Ministrdiń aitýynsha, qoǵamdyq pikirdiń qalyptasýyna blogerlerdiń yqpaly bolatyndyǵy túsinikti. Degenmen, kez kelgen jaǵdaida kórermen kásibi jýrnalisterdiń naqtylaýyn izdeidi.
«Menińshe, kásibi jýrnalistikanyń róli artady jáne biz oǵan járdem beretin bolamyz», - dedi ministr.
Sonymen qatar ol kásibi jýrnalistikanyń rólin arttyrý úshin ministrlik tarapynan qandai járdem kórsetiletindigine egjei-tegjeili toqtalyp ótti.
«Kadrlardy oqytý, qaita daiyndaý kózdelgen josparymyz bar. Osy jyldyń aqpanynan bastap salalyq jýrnalistikany damytý úshin jumys bastap kettik. Jekelegen joǵary oqý oryndarymen memorandýmdarǵa qol qoidyq. Meditsina, aýyl sharýashylyǵy, ekologiia, din syndy salalarda jýrnalister daiyndaimyz. Olar kásibi dáriger nemese ekolog bolmaityndyǵy túsinikti. Biraq, belgili bir salanyń erekshelikterin túsinetin bolady. Qazirdiń ózinde shamamen 300 jýrnalist sertifikat aldy jáne bul jumys jalǵasady. Memlekettik, sonymen qatar jeke buqaralyq aqparat quraldary jýrnalisteriniń biliktilik deńgeiin arttyrý úshin sheteldik mediamekteptermen de jumys isteimiz. Ministrlik jýrnalistikany damytýǵa múddeli. Bul rette negizgi faktor – jýrnalistika fakýltetinde qalai oqytylatyndyǵynda. Biyl oqý josparlaryn zerdeleý jáne belgili bir JOO-nyń, fakýltetterdiń baǵdarlamasy zamanaýi talaptarǵa sai kelmese, Bilim jáne ǵylym ministrligine usynymdar berý mindeti tur», - dedi Aida Balaeva.
