Aqparat jáne qoǵamdyq damý ministri Aida Balaeva «Facebook» kompaniiasynyń ministrlikpen birge jasalǵan málimdemeni teriske shyǵarýyna qatysty túsinik berdi, dep habarlaidy "Ult aqparat".
««Facebook» kompaniiasynyń birikken málimdemeni teriske shyǵarýyna qatysty buqaralyq aqparat quraldarynda «Meta» («Facebook») kompaniiasynyń Aziia-Tynyq muhity aimaǵy boiynsha Óńirlik keńsesiniń kommýnikatsiialar jónindegi direktory Ben MakKonehi myrzanyń (Ben McConaghy) teriske shyǵarǵan málimdemesine bailanysty Qazaqstan Respýblikasy Aqparat jáne qoǵamdyq damý ministrligi kelesini habarlaidy. Aqparat jáne qoǵamdyq damý ministrligi negizgi kelissózderdi Gonkong qalasynda ornalasqan Qytai, Mońǵoliia jáne Ortalyq Aziia óńiri boiynsha «Meta» («Facebook») kompaniiasynyń óńirlik ofisimen júrgizdi.
1 qarashada jariialanǵan birikken málimdemeniń mátini men onyń BAQ-da jariialanýy atalǵan aimaqtyq keńseniń basshylyǵymen tolyqtai kelisilgen bolatyn», - dep jazdy Balaeva Facebook-tegi paraqshasynda.
Eske sala keteiik, keshe QR Aqparat jáne qoǵamdyq damý ministrligi internettegi ziiandy kontentke qarsy is-qimyl máseleleri boiynsha Facebook-pen tyǵyz yntymaqtastyq týraly kelisimge kelgenin málim etken bolatyn.
«Qazaqstan Respýblikasynyń Úkimetine aqparattyq keńistiktiń qaýipsizdigin arttyrý máselesin sheshýge kómek kórsetý maqsatynda Facebook Qazaqstanǵa ishki «Kontentti habarlaý júiesine» («Content Reporting System» (CRS)) tikelei ekskliýzivti qoljetimdilik berdi.
CRS ministrlikke Facebook jahandyq kontenttik saiasatynyń da, Qazaqstan Respýblikasynyń ulttyq zańnamasynyń da buzýshylyqtary bar kontent týraly jedel habarlaýǵa múmkindik beredi.
Qazaqstan Ortalyq Aziiada kontenttik saiasatqa jaýap beretin Facebook kompaniiasynyń halyqaralyq komandasymen tikelei bailanys arnasyna jáne júiege qosylǵan alǵashqy el bolyp tabylady», - delingen edi ministrlik málimetinde.
