El táýelsizdiginiń 30 jyldyǵynda halqymyzdyń rýhani álemi, ulttyq sanasy men dúnietanymy jańardy, rýhani jáne mádeni qazynasyn álemdik órkenietpen ulastyrý baǵytynda qyrýar sharýa atqarylyp keledi.
Bul týraly «Rýhani damý jáne ulttyq dástúrlerdi saqtaý» taqyrybynda ótken dóńgelek ústel otyrysynda QR Aqparat jáne qoǵamdyq damý ministri Aida Balaeva aitty, dep habarlaidy QazAqparat.
«Naýryz meiramy yntymaǵy jarasqan halqymyz úshin qashanda birlik pen tatýlyq merekesi. Ásirese osy jyly bizdiń elimizdiń táýelsizdiginiń 30 jyldyǵy aiasynda Prezidentimiz osy jyldy «Reformalaý jyly» dep jariialaǵan bolatyn. Bul merekeniń mańyzy arta túsedi dep oilaimyn. Memleket basshysy «Táýelsizdik bárinen qymbat» atty maqalasynda kóktem merekesiniń mazmunyn baiytý týraly tapsyrma bergen bolatyn. Osyǵan sáikes jańa tujyrymdama ázirlenip, sonyń negizinde qoǵamdy igi isterge jumyldyryp, rýhani adamgershilik qundylyqtaryn nyǵaitýǵa baǵyttalǵan is-sharalar kesheni josparlanyp otyr», - deidi QR Aqparat jáne qoǵamdyq damý ministri Aida Balaeva.
Ministrdiń aitýynsha, rýhaniiat máselesine tek eski salt-dástúrdiń jiyntyǵy dep qaramaý kerek, ol - eskiniń tozyǵyn tastap, jańanyń ozyǵyn damytý degen sóz.
«El táýelsizdiginiń 30 jyldyǵynda rýhani jańǵyrýdyń san túrli belesterinen óttik. Halqymyzdyń rýhani álemi, ulttyq sanasy men dúnietanymy jańardy, rýhani jáne mádeni qazynasyn álemdik órkenietpen ulastyrý baǵytynda qyrýar sharýa atqarylyp keledi. Bul turǵyda Elbasynyń «Rýhani jańǵyrý» baǵdarlamasy – rýhani damýdyń basty alǵysharttarynyń biri dep bilemin. Búgingi dóńgelek ústeldiń taqyrybyna arqaý bolyp otyrǵan rýhani damý máselesi de birtindep órleý men joǵary qundylyqtardy uǵynýdy maqsat etedi. Zańǵar jazýshy Ábish Kekilbaevtyń «Jalpaq álemdi aýzyna qaratý úshin rýhani erlik kerek, jalpaq álemge qysylyp-qymtyrylmai qaraý úshin rýhani bailyq kerek» degen sózi rýhaniiattyń qoǵamdaǵy jáne adam ómirindegi rólin anyq kórsetip otyrǵany ras. «Paida oilama, ar oila» degen Abaidyń sózi áli kúnge deiin ózektiligin joǵaltqan joq. Áttegen-ai degen máseleler de az emes. Teris qylyqtardy áleýmettik jelilerden de, telearnalardan da jii aityp, synǵa aityp, talqylap júrmiz. Osynyń bári rýhani damýǵa qatysty oilarǵa jeteleidi», - deidi ol.
Sondai-aq, Aida Balaeva urpaq tárbiesiniń ózegi, túp negizi otbasynan bastaý alatynyn aitty.
«Ózderińiz biletindei, memlekettik otbasylyq demografiialyq saiasaty – bizdiń ministrlik quzyryndaǵy basty salalardyń biri. Sondyqtan bul baǵyttaǵy suraqtar únemi nazarymyzda. Bul oraida qoǵamdyq talqylaýlardyń, sarapshylardyń pikiri biz úshin árqashan mańyzdy», - deidi QR Aqparat jáne qoǵamdyq damý ministri Aida Balaeva.
Is-sharaǵa memlekettik organdar men ǵylymi-shyǵarmashylyq ziialy qaýym ókilderi, úkimettik emes uiymdardyń basshylary, sarapshylar qatysýda. Sondai-aq, sharaǵa qatysýshylar rýhani damý, ulttyq qundylyqtardy dáripteý, sanaly jáne rýhani urpaqty tárbieleý máselelerin talqylaýda.
