Prezident Joldaýynda atalǵan «Jaýapty memleket, jaýapty qoǵam, jaýapty adam» ustanymynyń túbinde qoǵamdyq tárbie uǵymy jatyr. Búgin elordada Otbasy kúni aiasynda ótken dóńgelek ústel otyrysynda Aqparat jáne qoǵamdyq damý ministri Aida Balaeva osylai dedi, dep habarlaidy QazAqparat.
«Biz úsh baǵyt boiynsha jumys toptaryn qurdyq. Jumys toptary otbasy institýtyn nyǵaitý, balalardy qoldaý men genderlik teńdikti ilgeriletý baǵytynda naqty ustanymdardy ázirleitin bolady. Ministrliktiń janynda otbasy institýtyn zertteý ortalyǵy jumys isteidi. Ortalyqtyń basty maqsaty – otbasy jáne kópbalaly otbasylardy qoldaý, demokratiialyq saiasat máseleleri boiynsha naqty zertteýlerdi júrgizý. «Rýhani jańǵyrý» baǵdarlamasy aiasynda da birqatar sharýa júzege asyrylyp otyr. Solardyń ishinde ásirese, dástúr men ǵuryp, ulttyq tárbie baǵytyndaǵy jobalardy erekshe atap aitqym keledi», - dedi Aida Balaeva «Otbasy kúni» aiasynda ulttyq tárbie berý men otbasy qundylyqtaryn damytý máseleleri talqylanǵan sharada.
Ministrdiń aitýynsha, bulardyń barlyǵy otbasylyq tárbie, jalpyhalyqtyq rýhani qundylyqtardy, ulttyq salt-dástúrdi nasihattap, ultaralyq qarym-qatynas pen toleranttyqty nyǵaitýǵa baǵyttalǵan.
«Prezident Qazaqstan halqyna Joldaýynda «Jaýapty memleket, jaýapty qoǵam, jaýapty adam» júiesin ornatý týraly aitty. Bul mindettiń túbinde qoǵamdyq tárbie uǵymy jatyr. Al tárbieniń bastaý bulaǵy, qainar kózi – otbasynda. Sondyqtan otbasylyq qundylyqtyń jańa zamanǵa sai úlgisin jasaý – bizdiń búgingi basty maqsatymyz. Bul oraida qoǵamdyq talqylaýdyń, halyq pikiriniń mańyzy qashan da zor», - degen ministr «dóńgelek ústelge« qatysýshylardan naqty usynystardy kútetinin jetkizdi.
