Balalar ádebietiniń 20 álemdik bestselleri qazaqshaǵa aýdarylady. Bul týraly Aqordada ótken Qoǵamdyq sanany jańǵyrtý jónindegi ulttyq komissiia otyrysynda QR Aqparat jáne qoǵamdyq damý ministri Aida Balaeva aitty, dep habarlaidy QazAqparat.
«Kúni keshe Ulttyq senim keńesiniń kezekti otyrysynda Memleket basshysy Qasym-Jomart Kemeluly: «...mektep jasyndaǵy balalardy kitap oqý ádetine úiretý» qajettigin basa aitty. Sondyqtan, bizdiń ministrliktiń bastamasymen Y.Altynsarin atyndaǵy Ulttyq bilim akademiiasynyń qatysýymen balalar ádebietiniń 20 álemdik bestsellerleriniń tizimi jasalyp, ishki qarjylyq múmkindikterdi qarastyra otyryp, aýdarmanyń aýdio elektrondyq nusqasyn jasaý týraly sheshim qabyldandy. Aldaǵy ýaqytta olardy basyp shyǵarý máselesi boiynsha Bilim jáne ǵylym ministrligi óz úlesin qosady degen senimdemiz», - dedi ministr.
Onyń atap ótýinshe, bul jumystardyń barlyǵy – el ishinde, ásirese, balalar men jastardyń arasynda rýhani-adamgershilik tárbie júiesin júzege asyrýdyń birtutas jol kartasyn qalyptastyryp, birneshe múddeli memlekettik organdardyń atsalysýymen iske asyrýdy kózdeidi.
Eske sala keteiik, Memlekettik hatshy Qyrymbek Kósherbaevtyń tóraǵalyǵymen ótken komissiia otyrysynda «Rýhani jańǵyrý» baǵdarlamasyn odan ári tereńdetip Ulttyq jańǵyrý kezeńine ótkizýdiń arnaiy Jol kartasyn jasaý qajet degen sheshim qabyldandy. Bul qujat asa mańyzdy ulttyq joba retinde júrgiziledi.
Ulttyq jańǵyrý jobasynyń eń basty máni – Ulttyń básekege qabilettiligin arttyrý. Bul – ulttyq jańǵyrýdyń strategiialyq maqsaty bolyp qalady. Jol kartasynda Memlekettik til mártebesin arttyrý, Bilim jáne ǵylymdy damytý, Joǵary ulttyq jáne jalpyadamzattyq qundylyqtar negizinde rýhani-adamgershilik jáne patriottyq tárbie berý, Eńbek adamyn qalyptastyrý, Aýyldy túletý siiaqty t.b keshendi is-sharalar qamtylady. Memlekettik hatshy otyrysty qorytyndylai kele, «Rýhani jańǵyrý» baǵdarlamasynyń basym baǵyttary boiynsha jumysty odan ári jandandyrý boiynsha naqty tapsyrmalar berdi.
