QR Aýyl sharýashylyǵy ministrligi Telegram messendjerinde chat-botty iske qosty. Endi ministrliktiń halyqqa jáne fermerlerge kórsetetin memlekettik qyzmetterin jedel alýǵa múmkindik bar, dep habarlaidy "Ult aqparat".
«2019-2020 jyldary «Halyq únine qulaq asatyn memleket» tujyrymdamasy jáne AÓK salasyn tsifrlandyrý jónindegi mindetter sheńberinde QR Aýyl sharýashylyǵy ministrligi barlyq memlekettik qyzmetterdi ońtailandyryp, elektrondyq formatqa aýdardy. Atqarylǵan jumystar týraly tolyq aqparat ótken jyldyń jeltoqsan aiynda vedomstvonyń memlekettik qyzmetter kórsetý salasyndaǵy 2020 jylǵy qyzmeti týraly esep barysynda jariialanǵan bolatyn.
Kelesi kezeńde AShM ótinishterdi berýdi jáne anyqtamalar men memlekettik qyzmetterdi alýdy jeńildetetin qural - resmi Telegram-bot engizdi», - dedi ministrlikten.
Málim etilgendei, Agro-bot qoldanýshylarmen qazaq jáne orys tilderinde «tildesedi», suranystarǵa jaýap beredi, sýbsidiialaý, ósimdik sharýashylyǵy, mal sharýashylyǵy, veterinariia, ósimdikterdi qorǵaý jáne karantin, litsenziialaý, jer qatynastary jáne ózge de máseleler boiynsha anyqtamalyq aqparatty jedel bere alady. Sonymen qatar atalǵan baǵyttar boiynsha memqyzmetterdi alýǵa bolady. Elektrondyq qyzmetke tapsyrys berý úshin Agro-bot paidalanýshyny egov.kz portalynyń qajetti paraqshasyna ótkizedi.
Sondai-aq Agro-bot arqyly usynystar, shaǵymdar qaldyrýǵa, QR Aýyl sharýashylyǵy ministrligimen jáne vedomstvonyń baspasóz qyzmetimen jedel bailanysýǵa múmkindik bar.
