Agroónerkásiptik keshendi damytýdyń ulttyq jobasy 2021 jyldyń shildesinde qabyldanady. Bul týraly búgin Úkimet otyrysynda Aýyl sharýashylyǵy ministri Saparhan Omarov aitty, dep habarlaidy QazAqparat.
«Memleket basshysynyń tapsyrmasy boiynsha ministrlik agroónerkásiptik keshendi damytýdyń kelesi 5 jylǵa arnalǵan ulttyq jobasy tujyrymdamasyn ázirleýde. Ulttyq jobanyń negizgi qaǵidattary - biznes úshin qarsy mindettemelerdi engize otyryp, memlekettik qoldaý sharalaryn birizdi jáne turaqty etý. Búgingi tańda agrobiznestiń, ǵylymnyń basqa da múddeli taraptary ókilderimen ulttyq jobanyń tujyrymdamasy belsendi talqylanyp jatyr. Aqpannyń birinshi onkúndiginde tujyrymdama jobasyn «Atameken» alańynda bizneske tanystyrýdy, odan keiin barlyq múddeli taraptar maquldaǵannan keiin Memlekettik josparlaý júiesiniń talaptaryna sáikes Parlament depýtattarynyń, memlekettik organdar, oblys ákimdikteri men agrobiznes ókilderiniń qatysýymen Úkimette qaraýdy josparlap otyr», - dedi ol.
Ministrdiń aitýynsha, ulttyq jobany iske asyrýdaǵy negizgi úles óńirlerge tiesili ekenin eskere otyryp, oblys ákimderi osy qujatty daiyndaýǵa, onyń ishinde sharalardy ázirleýge jáne indikativter qoiýǵa belsendi qatysýy qajet.
«Tujyrymdamany talqylaý qorytyndylary boiynsha ulttyq joba ázirlenetin bolady. Ony qabyldaý merzimi Memleket basshysynyń tapsyrmasyna sáikes 2021 jylǵy shildege belgilengen. Bul rette maýsym aiynan keshiktirmei Qazaqstan Respýblikasy Prezidentiniń janyndaǵy reformalar jónindegi Joǵary keńeste qaraý kózdelip otyr», - dedi Saparhan Omarov.
