Foto: Májilistiń baspasóz qyzmeti
Elimizde 20 jyldyń ishinde sharýalarǵa arzan paiyzben nesie beretin júie qurylmady. Mundai pikirdi Májiliste ótken dóńgelek ústel otyrysynda depýtat Anas Baqqojaev bildirdi, dep habarlaidy Kazinform agenttigi.
«Biz sharýalarǵa 20 jyldyń ishinde arzan paiyzben nesie beretin júie qura almadyq. Ony Úkimet moiyndaýy kerek. Qazirgi jaǵdaidyń bári sharýalardyń qarjyǵa degen qajettiligin qamtamasyz ete almai otyr. Sondyqtan agrarlyq bank quryp, ony sharýalardyń áleýmettik problemalaryn sheshýge baǵyttaý kerek. Búginde Otbasy banki jumys istep tur. Óte arzan paiyzben nesie beredi. Sebebi halyqty turǵyn úimen qamtamasyz etý kerek. Qazaqstan damý banki bar. Qajetti iri investitsiialyq jobalardy qarjylandyrady. Osy eki bankti qurǵan kezde esh suraq joq, al fermerlerdi qarjylandyrý máselesinde Ulttyq bankte de, Úkimette de qarsy dálel paida bola qalady. Bul durys emes», — dedi Májilis depýtaty.
Onyń atap ótýinshe, elimizdiń azyq-túlik qaýipsizdigin qamtamasyz etý úshin sharýalarǵa arzan jáne uzaqmerzimdi nesie berý júiesin qurý qajet.
«Ulttyq banktiń aitary sol baiaǵy áńgime. Degenmen, Ulttyq bank tóraǵasynyń orynbasary búgin agrobanktiń qurylýyna qarsy emes ekenin aityp qaldy. Bul — eń negizgi jaýap. Ulttyq bank bizge qarsy bolmasa, endi qalǵany — Úkimet pen Qarjy naryǵyn retteý jáne damytý agenttigi. Bizdiń esepteýimiz boiynsha agrobank 2,5 paiyzben nesie bere alar edi», — dedi Anas Baqqojaev.
