Mektepter men emhanalardaǵy jemqorlyq jaǵdailary tekserildi. Bul týraly 1424 Call ortalyǵy qyzmetiniń biylǵy 10 aidaǵy qorytyndysyn baiandaý kezinde Sybailas jemqorlyqqa qarsy is-qimyl agenttigi Strategiia jáne jedel basqarý departamentiniń basshysy Nurlan Jaqsymbetov málim etti, dep habarlaidy QazAqparat.
«Agenttik mektepterde, JOO-larda, emhanalarda aqsha jinaýǵa, dárilik preparattarǵa, meditsinalyq quraldarǵa jáne basqa da jaǵdailarǵa, iaǵni «turmystyq sybailas jemqorlyqqa» qatysty ótinishterdi nazardan tys qaldyrmaidy. 133 osyndai ótinish kelip túsken. Olardyń barlyǵy qoǵam men arnaiy monitoring toptaryn mindetti túrde tarta otyryp, muqiiat qarastyrylady. Bul jaǵdaida ákimdikterdiń tiisti qyzmetteriniń, eńbek ujymdaryniń, ata-analar komitetteriniń, sondai-aq ózge de ókilderdiń qatysýymen birlesken keńester ótkiziledi», - dedi E. Jaqsymbetov onlain brifingide.
Onyń aitýynsha, Atbasar jáne Stepnogor qalalarynyń mektep oqýshylary ata-analarynyń ótinishteri boiynsha mekteptiń «qajettilikterine» aqsha jinaý bóliginde (kvarts shamdary, perdeler, dárethana qaǵazy jáne t.b.) qyzmettik tekserý, sonymen qatar ata-analar arasynda jasyryn saýalnama júrgizildi. Nátijesinde, joǵaryda atalǵan faktiler rastaldy.
«Tekserý nátijeleri boiynsha Atbasar aýdanynyń jáne Stepnogor qalasynyń bilim bólimderiniń basshylary mektep direktorlarymen birge tártiptik jaýapkershilikke tartyldy», - dedi departament basshysy.
Onyń sózine qaraǵanda, Almaty, Jambyl jáne Qostanai oblystarynda mektep muǵalimderi men kolledj oqytýshylaryn merzimdi baspasóz basylymdaryna májbúrlep jazý faktisi jiilep ketti. Almaty oblysynda zeinetaqynyń bir bóligin baspasóz basylymdary túrinde berý faktisi bar.
«Barlyq ótinishter boiynsha ujymdarda túsindirý sharalary júrgizildi. Osy oraida bilim berý mekemeleri men «Qazposhta» AQ-nyń basshylaryna aldaǵy ýaqytta osyndai faktilerge jol bermeý týraly eskerte otyryp, merzimdi baspasóz basylymdaryna erikti túrde jazylýdyń mańyzdylyǵy aityldy», - dedi E. Jaqsymbetov.
Budan buryn habarlanǵandai, 1424 Call ortalyǵy qyzmetiniń biylǵy 10 aidaǵy qorytyndysy jariialandy.
