Ishki ister ministrligi qoǵam belsendisi Dýlat Aǵadildiń ólimin tergeýge qatysty qosymsha aqparat taratty, dep habarlaidy Sputnik Qazaqstan.
Tergeý departamentiniń basshysy Sanjar Ádilovtiń aitýynsha, búginnen bastap osy isti arnaiy prokýrorlar tergeitin boldy.
"Qazirgi kezde qylmystyq is arnaiy prokýrorlar basqarmasynyń óndirisinde. Olar bas prokýratýraǵa qaraidy", - dedi Ádilov jýrnalisterge bergen suhbatynda.
Onyń sózine qaraǵanda, Aǵadildiń týystary sot-meditsinalyq saraptamaǵa taǵy eki maman qatyssyn degen ótinish jasaǵan. Olarǵa ruqsat berildi. Al sot-meditsinalyq saraptamanyń tolyq qorytyndysy zań boiynsha 25-30 kúnde jasalady. Departament basshysy qoǵam belsendisi qalai ustalǵanyn da aityp berdi.
"Shuǵyl izdestirý sharalaryn Aqmola oblystyq departamenti qyzmetkerleri atqardy. Dýlat Aǵadil saǵat 20:37-de ustalǵan bolatyn. Odan keiin bizdiń qyzmetkerlerimiz ony emhanaǵa apardy. Sol jerde ol dene jaraqatynyń bar-joǵyn anyqtaityn tekseristen ótti. Sosyn narkologiia ortalyǵyna bardy. Mamandar Aǵadildiń ortasha deńgeide mas bolǵanyn anyqtady. Aǵadildiń ózi eshqandai qarsylyq kórsetken joq", - dep atap kórsetti Ádilov.
Dýlat Aǵadilmen birge tergeý izoliatorynda otyrǵan tórt adamnan jaýap alyndy. Ádilovtiń aitýynsha, olar jalpyǵa ortaq qylmystar úshin qamaýǵa alynǵan bolatyn. Alaida departament basshysy naqty qandai qylmys ekenin aitqan joq.
"Olardan jaýap alyndy. Sol málimetter de Dýlat Aǵadilge qatysty eshqandai zorlyq-zombylyqtyń jasalmaǵanyn rastap otyr", - deidi Ádilov.
Keshe, 25 aqpanda ishki ister organdary Nur-Sultandaǵy tergeý izoliatorynda qoǵam belsendisi Dýlat Aǵadildiń qaitys bolǵanyn habarlady. Oqiǵa ornyna jetken jedel járdem brigadasynyń qyzmetkerleri er adamnyń ólimin rastady. Onyń ólimine júrek-qan tamyr jetkiliksizdigi sebep bolǵany aitylyp otyr. Denesinde zorlyq-zombylyq belgisi joq. Sotqa deiingi tergeý bastaldy.
Eske sala ketsek, Dýlat Aǵadil qańtar aiynda syrttai aiyptalýshy dep tanylyp, eshqaida ketpeý týraly bultartpaý sharasy qoldanylǵan. Muny oryndamaǵany úshin sot qoǵam belsendisine qatysty sharany qamaýǵa alýǵa almastyrdy.
24 aqpan kúni saǵat 21:00-de Aǵadil úiinen tergeý abaqtysyna jetkizildi. Oǵan qatysty qylmystyq zańbuzýshylyq jasaǵany, sýdia men sot otyrysyna qatysýshylarǵa til tigizgeni úshin qylmystyq is qozǵalǵan bolatyn.
