ٸشكٸ ٸستەر مينيسترلٸگٸ قوعام بەلسەندٸسٸ دۋلات اعادٸلدٸڭ ٶلٸمٸن تەرگەۋگە قاتىستى قوسىمشا اقپارات تاراتتى, دەپ حابارلايدى Sputnik قازاقستان.
تەرگەۋ دەپارتامەنتٸنٸڭ باسشىسى سانجار ەدٸلوۆتٸڭ ايتۋىنشا, بٷگٸننەن باستاپ وسى ٸستٸ ارنايى پروكۋرورلار تەرگەيتٸن بولدى.
"قازٸرگٸ كەزدە قىلمىستىق ٸس ارنايى پروكۋرورلار باسقارماسىنىڭ ٶندٸرٸسٸندە. ولار باس پروكۋراتۋراعا قارايدى", - دەدٸ ەدٸلوۆ جۋرناليستەرگە بەرگەن سۇحباتىندا.
ونىڭ سٶزٸنە قاراعاندا, اعادٸلدٸڭ تۋىستارى سوت-مەديتسينالىق ساراپتاماعا تاعى ەكٸ مامان قاتىسسىن دەگەن ٶتٸنٸش جاساعان. ولارعا رۇقسات بەرٸلدٸ. ال سوت-مەديتسينالىق ساراپتامانىڭ تولىق قورىتىندىسى زاڭ بويىنشا 25-30 كٷندە جاسالادى. دەپارتامەنت باسشىسى قوعام بەلسەندٸسٸ قالاي ۇستالعانىن دا ايتىپ بەردٸ.
"شۇعىل ٸزدەستٸرۋ شارالارىن اقمولا وبلىستىق دەپارتامەنتٸ قىزمەتكەرلەرٸ اتقاردى. دۋلات اعادٸل ساعات 20:37-دە ۇستالعان بولاتىن. ودان كەيٸن بٸزدٸڭ قىزمەتكەرلەرٸمٸز ونى ەمحاناعا اپاردى. سول جەردە ول دەنە جاراقاتىنىڭ بار-جوعىن انىقتايتىن تەكسەرٸستەن ٶتتٸ. سوسىن ناركولوگييا ورتالىعىنا باردى. ماماندار اعادٸلدٸڭ ورتاشا دەڭگەيدە ماس بولعانىن انىقتادى. اعادٸلدٸڭ ٶزٸ ەشقانداي قارسىلىق كٶرسەتكەن جوق", - دەپ اتاپ كٶرسەتتٸ ەدٸلوۆ.
دۋلات اعادٸلمەن بٸرگە تەرگەۋ يزولياتورىندا وتىرعان تٶرت ادامنان جاۋاپ الىندى. ەدٸلوۆتٸڭ ايتۋىنشا, ولار جالپىعا ورتاق قىلمىستار ٷشٸن قاماۋعا الىنعان بولاتىن. الايدا دەپارتامەنت باسشىسى ناقتى قانداي قىلمىس ەكەنٸن ايتقان جوق.
"ولاردان جاۋاپ الىندى. سول مەلٸمەتتەر دە دۋلات اعادٸلگە قاتىستى ەشقانداي زورلىق-زومبىلىقتىڭ جاسالماعانىن راستاپ وتىر", - دەيدٸ ەدٸلوۆ.
كەشە, 25 اقپاندا ٸشكٸ ٸستەر ورگاندارى نۇر-سۇلتانداعى تەرگەۋ يزولياتورىندا قوعام بەلسەندٸسٸ دۋلات اعادٸلدٸڭ قايتىس بولعانىن حابارلادى. وقيعا ورنىنا جەتكەن جەدەل جەردەم بريگاداسىنىڭ قىزمەتكەرلەرٸ ەر ادامنىڭ ٶلٸمٸن راستادى. ونىڭ ٶلٸمٸنە جٷرەك-قان تامىر جەتكٸلٸكسٸزدٸگٸ سەبەپ بولعانى ايتىلىپ وتىر. دەنەسٸندە زورلىق-زومبىلىق بەلگٸسٸ جوق. سوتقا دەيٸنگٸ تەرگەۋ باستالدى.
ەسكە سالا كەتسەك, دۋلات اعادٸل قاڭتار ايىندا سىرتتاي ايىپتالۋشى دەپ تانىلىپ, ەشقايدا كەتپەۋ تۋرالى بۇلتارتپاۋ شاراسى قولدانىلعان. مۇنى ورىنداماعانى ٷشٸن سوت قوعام بەلسەندٸسٸنە قاتىستى شارانى قاماۋعا الۋعا الماستىردى.
24 اقپان كٷنٸ ساعات 21:00-دە اعادٸل ٷيٸنەن تەرگەۋ اباقتىسىنا جەتكٸزٸلدٸ. وعان قاتىستى قىلمىستىق زاڭبۇزۋشىلىق جاساعانى, سۋديا مەن سوت وتىرىسىنا قاتىسۋشىلارعا تٸل تيگٸزگەنٸ ٷشٸن قىلمىستىق ٸس قوزعالعان بولاتىن.
