Adam quqyqtary jónindegi ýákil Elvira Ázimova qoǵam belsendisi Dýlat Aǵadildiń tergeý izoliatorynda qaitys bolýyna qatysty pikir bildirdi, dep habarlaidy Sputnik Qazaqstan.
"Keshe, 24 aqpanda Dýlat Aǵadildi tergeý izoliatoryna mas kúiinde jetkizdi. Alaida ol mańyzdy emes. Eń bastysy, ony ustaý, abaqtyǵa otyrǵyzý jáne alǵashqy meditsinalyq kómek kórsetý jaǵynan tártip buzýshylyqtar bolmaýy tiis. Osy oraida azamattyq qoǵam ókilderi oqiǵa ornyna baryp, zorlyq-zombylyq jáne adamnyń ar-namysyn qorlaýǵa qatysty taǵy basqa máselelerdi teksere alady", - dedi Ázimova astanada ótken baspasóz máslihatynda.
Onyń aitýynsha, qazirgi kezde Aǵadil jáne taǵy tórt adam otyrǵan tergeý izoliatorynda táýelsiz toptyń ókili júr. Ol beinebaqylaý kamerasynyń jazbalaryn jan-jaqty zerdelep shyǵady.
"Adam [izoliator] qaqpasynan attaǵan soń onyń árbir qadamyn kamera túsiredi. Jazbanyń jalpy ýaqyty shamamen 8 saǵat, táýelsiz toptyń ókili sonyń bárin qarap shyǵýy kerek. Ony tekserý ýaqyt alady. Aǵadil myrza qoǵam belsendisi bolǵan. Azamattyq qoǵam tarapynan onyń ólimine qatysty suraqtar bar. Kúdik te joq emes. Sondyqtan biz tártip buzýshylyqtar boldy ma, joq pa, sony jan-jaqty zerdelep shyǵýymyz qajet ", - dep atap kórsetti Ázimova.
Onyń sózine qaraǵanda, marqumnyń otbasyna advokat berildi. Ol sot-meditsinalyq saraptamany baqylaidy. Al úkimettik emes uiymdar memlekettik saraptamadan bólek táýelsiz sot saraptamasyn uiymdystyrý jaǵyn pysyqtap jatyr.
Aita keteiik, búgin ishki ister organdary Nur-Sultandaǵy tergeý izoliatorynda qoǵam belsendisi Dýlat Aǵadildiń qaitys bolǵanyn habarlady.
"Nur-Sultandaǵy tergeý izoliatorynda 1977 jyly týǵan qoǵam belsendisimen birge taǵy tórt adam bolǵan. Olar Dýlat Aǵadilge zorlyq-zombylyq jasalmaǵanyn aitty", - deidi politseiler.
Sot saraptamasynyń qorytyndysyna sáikes, qoǵam belsendisi ustalǵan kezde mas bolǵan.
Oqiǵa ornyna jetken jedel járdem brigadasynyń qyzmetkerleri er adamnyń ólimin rastady. Onyń ólimine júrek-qan tamyr jetkiliksizdigi sebep bolǵany aitylyp otyr. Denesinde zorlyq-zombylyq belgisi joq. Sotqa deiingi tergeý bastaldy.
Eske sala ketsek, Dýlat Aǵadil qańtar aiynda syrttai aiyptalýshy dep tanylyp, eshqaida ketpeý týraly bultartpaý sharasy qoldanylǵan. Muny oryndamaǵany úshin sot qoǵam belsendisine qatysty sharany qamaýǵa alýǵa almastyrdy.
Keshe, 24 aqpan kúni saǵat 21:00-de Aǵadil úiinen tergeý abaqtysyna jetkizildi. Oǵan qatysty qylmystyq zańbuzýshylyq jasaǵany, sýdia men sot otyrysyna qatysýshylarǵa til tigizgeni úshin qylmystyq is qozǵalǵan bolatyn.
