Sońǵy otyz jyldaǵy qurǵaqshylyqtyń saldarynan Afrika elderinde 13 million adam ashtyqtan zardap shegýi múmkin, dep habarlaidy QazAqparat BUU jańalyqtar saityna silteme jasap.
«Efiopiia, Keniia jáne Somalide qatarynan ótken úsh jańbyrly maýsymda jaýyn-shashyn az túsken. Bul eginniń óspeýine jáne maldardyń qyrylýyna ákeldi. Kóptegen otbasylar sý men jaiylymnyń jetispeýshiliginen úilerin tastap, qalaǵa ketýge májbúr etýde. Sonymen qatar, qaýymdastyqtar arasynda qaqtyǵystar kóbeigen. Afrika elderinde qýańshylyqtan egin qýrap, mal qyrylyp, asharshylyq bolýda», - dedi BUU Búkilálemdik azyq-túlik baǵdarlamasy Shyǵys Afrikadaǵy turaqty biýrosynyń direktory Maikl Danford. Sonymen qatar, jaqyn arada jaýyn-shashynnyń ortashadan tómen túsetini týraly boljam onsyz da aýyr jaǵdaidy ýshyqtyrýy múmkin. Qurǵaqshylyq Efiopiianyń ońtústiginde jáne ońtústik-shyǵysynda, Keniianyń ońtústik-shyǵysynda jáne soltústiginde jáne ońtústik-ortalyq Somalide jaiylymdyq jáne fermerlik qaýymdastyqtardy joiyp jiberdi. Bul negizgi azyq-túlik ónimderi baǵasynyń ósýine ákelip, aýyl sharýashylyǵyndaǵy jumysshylar kúshine degen suranysty odan ári tómendetti. Osynyń bári azyq-túlikpen qamtamasyz etýde qiyndyqtar týǵyzdy. Shuǵyl sharalar qabyldanbasa, jaǵdai tek ýshyǵa túsedi.
IýNISEF-tiń boljamy boiynsha, Afrika elderinde azyqqa muqtaj adamdardyń sany Gretsiia men Shvetsiia halqymen teń derlik.
«Olardyń kóbi - 40 jyldaǵy eń nashar klimattyq tótenshe jaǵdailardyń birine bailanysty qaýip tónip turǵan balalar», - dedi BUU Balalar qorynyń (IýNISEF) Shyǵys jáne Ońtústik Afrikadaǵy óńirlik direktory Mohamed Foll.
Aimaqtyń COVID-19, qaqtyǵystar jáne klimattyń ózgerýi siiaqty tónip turǵan birden úsh qaýipke tótep bere almaitynyn eskertken IýNISEF ókili kóptegen balalardyń baspana, tamaq, bilimnen jáne meditsinalyq kómekten aiyrylǵanyn atap ótti. Qazirgi ýaqytta aimaqtaǵy 5,5 millionǵa jýyq balaǵa ashtyq qaýpi tónip tur. Bul daǵdarystan shyǵý úshin búkil halyqaralyq qaýymdastyqtyń ujymdyq kúsh-jigeri qajet.
2022 jyly Afrika elderinde operatsiialar úshin IýNISEF donorlardan 123 million dollar surady.
«Milliondaǵan adamdardyń ómiri men bolashaǵy osyǵan bailanysty. Birlesip, shuǵyl, jan-jaqty áreket etýimiz kerek», - dedi IýNISEF ókili.
