Foto: Aqorda
AES boiynsha referendýmda daýys bergennen keiin BAQ ókilderine shaǵyn suhbat bergen Memleket basshysy Qasym-Jomart Toqaev "Referendým qorytyndysy boiynsha halqymyz AES salýdy qoldasa, onyń qurylysyn qai el júrgizedi?" degen suraqqa jaýap berdi.
"Bul ońai másele emes. Úkimet taldaý jasap, tiisti kelissózder júrgizýge tiis. Meniń pikirimshe, Qazaqstanda eń ozyq tehnologiialary bar álemdik kompaniialardan quralǵan halyqaralyq konsortsiým jumys isteýi qajet. Qalǵanyn ýaqyt kórsetedi", – dedi Memleket basshysy.
Osydan keiin prezident el Úkimetiniń jumysyn baǵalady.
"Qazaqstan Úkimeti qazirgi quramda týra 7 ai jumys istedi. Referendýmnan keiin onyń quramy ózgeredi degen boljamdar aitylyp júr. Úkimettiń jumysyna kóńilińiz tola ma?" - dep surady jýrnalister.
"Menińshe, Úkimet tyrysyp, belsendi jumys istep jatyr. Memleket basshysy retinde men júktegen tapsyrmalardy oryndap keledi. BAQ-ta kórine bermeýi múmkin, bizdegi jumys óte qaýyrt. Óitkeni, aqparattardy alyp otyramyn. Jalpy, men oqityn adammyn. Sondyqtan barlyq oqiǵadan únemi habardarmyn. Árine, ministrlerdiń, Úkimet basshylyǵynyń jumysynda kemshilikter bar. Biraq, 7 ai – qysqa ǵana merzim. Úkimet músheleri ózderin kórsetýi tiis. Basty mindet – elimizdiń ekonomikalyq ósim kózderin izdeý", - dep jaýap berdi Memleket basshysy.
Jýrnalister Prezidentten biyl kóktemdegi alapat sý tasqynynan keiin qandai qorytyndy jasalǵanyn surady.
"Tiisti qorytyndy jasaldy. Biraq mundai tabiǵat apaty búkil jer sharynda oryn alyp jatqanyna basa mán berýimiz kerek. Jaqynda ǵana Ortalyq Eýropada alapat tasqyn ótti. Onyń aldynda AQSh pen Vetnamda daýyl boldy. Sondyqtan mundai apattardy aldyn ala boljaý qiyn. Degenmen ondai jaǵdaiǵa daiyn bolyp, qajetti sharalar qabyldaý mańyzdy. Qazaqstan eshkimniń kómeginsiz tasqynnyń saldaryn eńsere aldy. Muny ashyq aitý kerek. Biz adam jáne qarjy resýrstaryn osy iske jumyldyrdyq. Úkimet pen ákimder belsendi jumys istedi. Onyń nátijesin kórip otyrsyzdar. Alapat tasqyn kezinde zardap shekken azamattar jańa baspanamen qamtyldy. Men buǵan deiin eshkim nazardan tys qalmaidy dep ýáde berdim. Jalpy alǵanda, biz bul maqsatty oryndadyq",– dedi Memleket basshysy.
