Ońtústik Qazaqstan oblysynda zorlandy degen 7 jasar balaǵa qatysty is ýshyǵa túskendei. 1-synyp oqýshysy men onyń ájesine zańgerlik kómek kórsetip, istiń basy-qasynda júrgen advokat Qurmanǵazy Músirdiń aitýynsha, OQO IID Kriminaldy politsiia basqarmasynyń basshysy Baýyrjan Seltanovtyń ústinen qylmystyq is qozǵalypty. Bul týraly ol 31-arna tilshilerine bergen suhbatynda aityp berdi.
Buǵan deiin habarlaǵanymyzdai, Qurmanǵazy Músir men Dinmuhammed Artyqovqa aýyl bii Nurman Merejepov shyǵyp, atalǵan isti ýshyqtyrmai jaýyp tastaýyn surapty. Sebebin ol ózine kórsetilgen qysymmen túsindirgen. Iaǵni, Baýyrjan Seltanov: «inilerińdi qoidyrmasań óziń qamalasyń» dep qorqytqan kórinedi.
«Jaǵam qaiyrylyp qalǵan eken, sony týralaǵan bolyp ustady da, Nurman saǵan betińe aitamyn dedi. Myna ekeýin toqtatasyń. Toqtatpasań, isim senimen bolyp, men seni podstavit etip qurtamyn dedi. Men bekerden-beker qamalyp ketemin be, bala-shaǵamdy kim asyraidy erteń? Áli barlyǵy mektepke barady, jas balalar. Men ne úshin qamalýym kerek, men ol jerde bolmasam, qatysym joq bolsa bul tirlikke?» - dep ashynady Abai aýylynyń bii Nurman Merejepov.
Aita keteiik, 7 jasar balany zorlaýy múmkin dep aiyptalyp jatqan joǵary synyp oqýshylarynyń mektep direktory osy Baýyrjan Seltanovtyń jeńgesi. Al, Baýyrjannyń ákesi Saparáli Seltanov jergilikti máslihattyń depýtaty.
Kriminaldy politsiia basqarmasy basshysyna qatysty oblystyq ishki ister departamentindegiler ázirge tis jaryp eshteńe aitqan joq. Prokýratýra organdary da Seltanovqa qatysty ázirge málimet taratpady.
