Foto: Azattyq
Túrmedegi oppozitsiia belsendisi Marat Jylanbaev densaýlyǵyna bailanysty ashtyqty toqtatty. Bul jóninde advokaty Meiirjan Dosqaraev Azattyqqa habarlady. Onyń sózinshe, Jylanbaev ashtyqty 12 aqpanda doǵarǵan dep habarlaidy "Ult Aqparat" Azattyqqa silteme jasap.
Belsendi Amangeldi Jahinniń aitýynsha, dúisenbi, 12 aqpanda jaqtastary Stepnogorsk túrmesine baryp, Jylanbaevpen kezdespek bolǵan, alaida olar kire almaǵan. Sol kúni tek Jylanbaevtyń áieli men qyzy túrmege kirip, jaqynymen kezdese alǵan.
"21 kún ashtyq ustaýdyń ózi erlik. Men Jylanbaevty [ashtyqty toqtatý týraly] sheshimin tolyq qoldaimyn. Qazirgi rejim úshin densaýlyqty qurban etýden mán joq" dedi Jahin 16 aqpanda Azattyqqa.
Juma kúni Azattyq Jylanbaev otyrǵan Stepnogorskidegi N4 mekemege habarlasa almady.
Byltyr qarashada jeti jylǵa sottalǵan Marat Jylanbaev jýyrda 24 qańtarda úkimge qarsylyq retinde ashtyq jariialaǵan.
Onyń aldynda 19 qańtarda Astana qalalyq soty onyń úkimin ózgerissiz qaldyrǵan. Alǵashqy instantsiiadaǵy sot Jylanbaevty 7 jyl túrmege kesken. Azamattyq belsendige "ekstremistik uiymnyń isine aralasty" jáne "ekstremizmdi qarjylandyrdy" degen aiyptar taǵylǵan. Buǵan deiin prokýratýra tirkelmegen "Alǵa, Qazaqstan" partiiasynyń lideri Marat Jylanbaev "QDT ekstremistik uiymynan tapsyrma alyp, olardyń qyzmetin qarjylandyrǵan" dep aiyptaǵan. (Astana shetelde turatyn eks-bankir Muhtar Ábliazovtyń QDT qozǵalysyn "ekstremistik uiym" dep tanyp, qyzmetine tyiym salǵan. Eýroparlament QDT qozǵalysyn "beibit oppozitsiialyq uiym" dep ataidy). Jylanbaev pen jaqtastary istiń saiasi astary bar degen.
Belsendige jergilikti jáne halyqaralyq quqyq qorǵaý uiymdary arasha tústi.
