Búgin Qylmystyq ister jónindegi mamandandyrylǵan aýdanaralyq sotynyń sýdiasy Ashat Áshirbekov elordalyq meditsinalyq oqý ornynyń 23 jastaǵy stýdenti Erasyl Áýbákirovtiń ólimine qatysty atyshýly iste úkim shyǵardy. Úkim oqylǵannan keiin Erasyl Áýbákirovtiń otbasynyń advokaty Telman Álenov istiń keibir jai-japsaryn aityp berdi, - dep habarlaidy kaz.tengrinews.kz tilshisi.
"Bastapqyda, sotaldy tergeýdiń barysynda tergeý organdary Aian Meiirbaevtyń bul iske qatysy bar tujyrymǵa keldi. Sotaldy tergeýdiń barysynda qosymsha dálelderdiń tabylýyna bailanysty, Ájimbaidyń tarapynan qandai da bir burys áreketterdiń bolǵany anyqtaldy. BAQ-tarǵa shyndyqty bultartatyn videojazbalar tarap ketti. Bul jerde Meiirbaev Áýbákirovti óltirdi degen nusqa boldy. Al video osy maqsatta, ol Erasyldy julqylap jatqandai qylyp kórsetý úshin túsirilgen", - dep habarlady marqumnyń ata-anasynyń múddesin qorǵaityn advokat.
"Jalpy alǵanda Ájimbaidyń oiy jeke kásipker Esen Meiirbaevtyń balasyna qatysty bopsalaý materialyn jinaý bolǵan. Meniń túsingenim boiynsha, ol qurylys biznesimen ainalysqan. Al Ájimbai sol kásipkerdiń balasy Aian arqyly (olar bir topta oqyǵan) ákesiniń úlken saýda ortalyǵyn satyp jatqanyn bilip alǵan. Sodan Ájimbai sol saýdadan 15 paiyzyn alǵysy kelgen. Al kásipker ony bere salmaidy ǵoi. Sodan Ájimbai osyndai jolmen óz oiyn júzege asyrǵysy kelgen", - dedi Telman Álenov.
"Osy maqsatta ol kottedj jaldap, ol jaqqa Meiirbaevty shaqyrǵan, ony kúshtep araq ishýge májbúrlegen. Sodan keiin kottedjge Erasyl Áýbákirovti aldap shaqyrǵan. Mine, osy kezde video qasaqana túsirilgen. Keiin bul videony Ájimbai whatsapp arqyly Meiirbaevtyń ákesine jiberip, balasy bireýdi óltirip jatyr, al máiit kóliktiń júksalǵyshynda jatyr dep keltiredi. Oqiǵa osylaisha jalǵasyn tabady", - dedi advokat.
Onyń aitýynsha, Erasyl Áýbákirovti qylǵyndyryp óltirgennen keiin, onyń máiiti Meiirbaevtyń kóliginiń júksalǵyshyna salynǵan.
"Bul oqiǵa 2016 jyldyń 3 aqpanynda bolǵan, al máiit kólikten 4 aqpanda keshki ýaqytta tabylǵan", - dep habarlady Telman Álenov. Al osydan keiin Aian Meiirbaevtyń týysy júksalǵyshynda máiittiń baryn bilmei, kólikti jýýǵa aparǵan.
"Kólik jýýshy júksalǵyshty ashyp qalǵanda, máiitti kórgen. (...) Qyz shoshyp ketip, ne isterin bilmegen, sondyqtan máiit qala syrtyna jetkizilgen", - dep túsindiredi advokat.
"Sóitip, olar (Erasyl Áýbákirov pen Aian Meiirbaev - Avt.) jábirlenýshiler. Ol (Ájimbai - Avt.) videojazbany alyp, Meiirbaevtyń ákesinen 15 paiyz delingen 135 million teńgeni bopsalamaq bolǵan", - dep bildirdi pikirin advokat.
"Osydan keiin Ájimbaidyń ózi qylmystyq qýdalaýǵa ushyrady. Ol ózi politsiiaǵa kelip, videony kórsetken, videony oida joqta túsirip aldym degen. Al Áýbákirovti Aian Meiirbaev óltirdi dep málimdegen. Munyń barlyǵy da aqsha úshin jasalǵan", - dep málimdedi qorǵaýshy. Ol Erasyl Áýbákirovtiń Aian Meiirbaevpen de, Nurbek Ájimbaimen de tanys bolmaǵanyn aityp ótti.
"Sotaldy tergeý barysynda bul iste seksýaldyq mándegi zorlyq áreketteri bar degen tujyrym jasaldy. Aiyptaý aktisinde Erasyl Áýbákirovtiń intim qyzmetterin usynatyn adam retinde kórsetiledi. Biraq biz barlyǵymyz bul nusqamen kelispeitinimizdi aittyq, sebebi is materialdarynda onyń intim qyzmet usynatyn adam retinde kórsetetin materialdar jetkiliksiz. Taraptardy qatar tyńdaý kezeńinde alqa bilerge osy jai-japsardy aityp berdik, intim qyzmetti usyndy dep aitýǵa, dálelder bolýy kerektigin aittyq. (...) Bul Erasyl Áýbákirovtiń ar-namysy men abyroiyn ǵana emes, onyń otbasynyń da, týystarynyń da abyroiyna nuqsan keltiredi. Alqa bilerdiń bul jaǵdaidy qalai qabyldaǵanyn shyn máninde kórdik. Dálelder bolmasa, qalaisha mundai tujyrym jasaýǵa bolady, qalaisha ony dálelsiz seksýaldy sipattaǵy áreketterdi jasady dep aita alamyz?", - deidi Telman Álenov.
Sondai-aq, ol sottalýshylardyń "Seksýaldy sipattaǵy zorlyq áreketteri" baby boiynsha kináli dep tanylmaǵanyn atap ótti.
Advokat Telman Álenov (sol jaqta) jáne marqumnyń ákesi Ómirbek Áýbakirov (oń jaqta).
Suhbat barysynda Erasyl Áýbákirovtiń ákesi advokat aitqan mán-jaidyń barlyǵyn qoldaitynyn jetkizdi.
"Men ne aita alamyn. Meniń advokatym barlyq rastap berdi, aitty. Úkimdi kóńilimiz tola ma, tolmai ma, ol mańyzdy emes, biraq biz ulymyzdy endi qaitara almaimyz", - dedi Ómirbek Áýbákirov.
"Munda bir ǵana kóńil kónshiterlik jaǵdai bar, kóńil-kúiimiz ornyna keldi, balamyzǵa intim qyzmet usynýmen ainalysty dep jala jabylǵany janymyzǵa batty. Biraq bul sózden qutyldyq. Kóńilimiz jailanyp ta úlgermedi", - dedi Áýbákirovter áýletiniń advokaty.
Sot otyrysy jabyq tártipte ótti. Telman Álenov protsess barysynda barlyq taraptyń sóz sóilei alǵanynyna nazar aýdardy. "Sot zalynda aitary barlardyń bári tyńdaldy. Onyń ústine, sottalýshylarǵa jeńildikter jasaldy, alqa bilerdiń otyrǵanyna qaramastan, sottalýshylardyń óz kózqarasy boiynsha jalǵan málimet berip jatqanynda da sózin eshkim bólmedi. Olardyń jaýaby shyndyqqa janaspady, biraq sýdia olardyń sózin bólmedi, sóitip, olar aitqysy kelgeniniń barlyǵyn aitty. Iaǵni olardy sot tolyqtai tyńdady, sebebi ádil boldy, tolyq zertteý júrgizildi, osynyń barlyǵy adamdardyń úkimdi durys túsinýi úshin jasaldy", - dedi jábirlenýshi taraptyń advokaty.
Aita keteiik, bir ai buryn, 7 qyrkúiekte Astanada atyshýly iske qatysty sot bastalǵan bolatyn. 23 jastaǵy Erasyl Áýbákirovti óltirdi degen kúdikpen sot aldyna úsh adam keldi: Nurbek Ájimbai, Vitalii Sherstenev jáne Andrei Tihonenko. Olarǵa "Uiymdasqan qylmystyq top qurý jáne oǵan basshylyq etý", "Adamdy bostandyǵynan zańsyz aiyrý", "Seksýaldyq sipattaǵy zorlyq áreketteri", "Adam óltirý" jáne "Bopsalaý" baptary boiynsha aiyp taǵyldy.
Al búgin, 12 qazanda osy atyshýly is boiynsha úkim shyǵaryldy. Oǵan sáikes, Nurbek Ájimbai múlki tárkilene otyryp, 20 jylǵa bas bostandyǵynan aiyryldy. Andrei Tihonenko 16 jylǵa bas bostandyǵynan aiyryldy, al Vitalii Sherstnev 11 jylǵa sottaldy. Condai-aq, sotta Aian Meiirbaevtyń kináli emes ekeniniń dáleli keltirildi. Bul týraly jábirlenýshi taraptyń ókili úkim oqylǵannan keiin aityp berdi.
Aita keteiik, bul iste bastapqyda Aian Meiirbaev kúdikti bolǵan edi. Oǵan qatysty qýdalaý qylmys quramynyń joq bolýyna bailanysty toqtatylǵan edi. Ol tergeý izoliatorynan bosap shyqty.
Eske salaiyq, biyl aqpanda Astanada meditsinalyq ýniversitettiń altynshy kýrsynda oqityn Erasyl Áýbákirov joǵalyp ketken bolatyn. Ol Saryarqa - Seifýllin qiylysyndaǵy úiinen sol jaǵalaýǵa qarai shyǵyp ketip, tabylmaǵan edi. Keiin, 10 aqpanda onyń máiiti zorlyq belgilerimen tabylǵan.
