Almatyda sportshy Denis Tenniń ólimine qatysty aldyn ala sot tyńdaýynda jábirlenýshi taraptyń advokaty Tenniń "tapsyryspen óltirilgenin" málimdep, isti qaita tergeýge jiberýdi surady.
Advokat Nurlan Óstemirov sotta qylmystyń "tapsyryspen jasalý sipaty baryn" jáne protsessýaldyq zań buzyldy dep sanaityn aitty.
Ol qylmys jasaǵan sybailastardy anyqtaý úshin isti prokýratýraǵa qosymsha tergeýge jiberýdi suraitynyn málimdedi.
«Denistiń anasy ekeýimiz 39 tomdyq isti qarai kele qarama-qaishylyqqa toly 14 derekti taptyq. Ol derekter bul qylmystyń tapsyryspen bolǵanyn kórsetedi. Sondyqtan, ol tulǵalardy da jaýapqa tartý úshin atalǵan isti bólek óndiriske bólý maqsatynda prokýrorǵa qaita qaraýǵa jiberýdi suraimyz»,- dedi Oksana Tenniń ókili Nurlan Óstemirov.
Advokat buǵan qosa sotqa qylmysqa kúdikti Arman Qudaibergenov jasaǵan urlyqtan zardap shekken astanalyq turǵyn Samar Shamshievti ákelý týraly da talap-aryz túsirdi.
Protsessýaldy prokýror Qýandyq Dosov isti qaita qaraý týraly talap aryzdy qanaǵattandyrmaýdy ótindi.
Sýdia atalǵan talap-aryzdy keńesý bólmesinde sheshetinin aitty. Sonymen qatar, prokýror is boiynsha 26 kýəger suralatynyn aitty.
25 jeltoqsanda Almaty qalalyq qylmystyq ister jónindegi mamandandyrylǵan aýdanaralyq sotynda sportshy Denis Tenniń ólimine qatysty aldyn-ala sot tyńdaýy bastaldy. Oǵan sportshynyń týystary, kúdikti jáne kúdiktilerdiń jaqyndary, advokattar, aqparat quraldary qatysyp jatyr. Isti sýdia Keńshilik Abdeldinov júrgizip jatyr.
Qazaqstandyq mánerlep syrǵanaýshy, Sochi olimpiadasynyń qola júldegeri, Aziia oiyndarynyń chempiony Denis Ten 19 shildede Almatyda pyshaq jaraqatynan aýrýhanada qaza tapqan. Sportshy qala ortalyǵynda kóliginiń janynda áldekimder salǵan pyshaq jaraqatynan aýrýhanaǵa jetkizilgen soń qaitys bolǵan. Aldyn-ala derek boiynsha, ol kóliginiń ainasyn urlaǵan adamdardy toqtatpaq bolǵan kezde jaralanǵan.
Tenniń ólimine qatysty iste úsh kúdikti bar. Olar - Nuraly Qiiasov, Arman Qudaibergenov jáne Janar Tolybaeva. Qiiasov jáne Qudaibergenovke Qylmystyq kodekstiń "buzaqylyq" jáne "adam ólimi" baptary boiynsha aiyptar taǵylǵan. Al Tolybaeva "qylmysty habarlamaý" aiyby boiynsha kúdikke ilingen. Budan bólek, úsheýine de ózara kelisip "urlyq jasady" degen aiyp taǵylǵan.
