الماتىدا سپورتشى دەنيس تەننٸڭ ٶلٸمٸنە قاتىستى الدىن الا سوت تىڭداۋىندا جەبٸرلەنۋشٸ تاراپتىڭ ادۆوكاتى تەننٸڭ "تاپسىرىسپەن ٶلتٸرٸلگەنٸن" مەلٸمدەپ, ٸستٸ قايتا تەرگەۋگە جٸبەرۋدٸ سۇرادى.
ادۆوكات نۇرلان ٶستەمٸروۆ سوتتا قىلمىستىڭ "تاپسىرىسپەن جاسالۋ سيپاتى بارىن" جەنە پروتسەسسۋالدىق زاڭ بۇزىلدى دەپ سانايتىن ايتتى.
ول قىلمىس جاساعان سىبايلاستاردى انىقتاۋ ٷشٸن ٸستٸ پروكۋراتۋراعا قوسىمشا تەرگەۋگە جٸبەرۋدٸ سۇرايتىنىن مەلٸمدەدٸ.
«دەنيستٸڭ اناسى ەكەۋٸمٸز 39 تومدىق ٸستٸ قاراي كەلە قاراما-قايشىلىققا تولى 14 دەرەكتٸ تاپتىق. ول دەرەكتەر بۇل قىلمىستىڭ تاپسىرىسپەن بولعانىن كٶرسەتەدٸ. سوندىقتان, ول تۇلعالاردى دا جاۋاپقا تارتۋ ٷشٸن اتالعان ٸستٸ بٶلەك ٶندٸرٸسكە بٶلۋ ماقساتىندا پروكۋرورعا قايتا قاراۋعا جٸبەرۋدٸ سۇرايمىز»,- دەدٸ وكسانا تەننٸڭ ٶكٸلٸ نۇرلان ٶستەمٸروۆ.
ادۆوكات بۇعان قوسا سوتقا قىلمىسقا كٷدٸكتٸ ارمان قۇدايبەرگەنوۆ جاساعان ۇرلىقتان زارداپ شەككەن استانالىق تۇرعىن سامار شامشيەۆتٸ ەكەلۋ تۋرالى دا تالاپ-ارىز تٷسٸردٸ.
پروتسەسسۋالدى پروكۋرور قۋاندىق دوسوۆ ٸستٸ قايتا قاراۋ تۋرالى تالاپ ارىزدى قاناعاتتاندىرماۋدى ٶتٸندٸ.
سۋديا اتالعان تالاپ-ارىزدى كەڭەسۋ بٶلمەسٸندە شەشەتٸنٸن ايتتى. سونىمەن قاتار, پروكۋرور ٸس بويىنشا 26 كۋəگەر سۇرالاتىنىن ايتتى.
25 جەلتوقساندا الماتى قالالىق قىلمىستىق ٸستەر جٶنٸندەگٸ مامانداندىرىلعان اۋدانارالىق سوتىندا سپورتشى دەنيس تەننٸڭ ٶلٸمٸنە قاتىستى الدىن-الا سوت تىڭداۋى باستالدى. وعان سپورتشىنىڭ تۋىستارى, كٷدٸكتٸ جەنە كٷدٸكتٸلەردٸڭ جاقىندارى, ادۆوكاتتار, اقپارات قۇرالدارى قاتىسىپ جاتىر. ٸستٸ سۋديا كەڭشٸلٸك ابدەلدينوۆ جٷرگٸزٸپ جاتىر.
قازاقستاندىق مەنەرلەپ سىرعاناۋشى, سوچي وليمپياداسىنىڭ قولا جٷلدەگەرٸ, ازييا ويىندارىنىڭ چەمپيونى دەنيس تەن 19 شٸلدەدە الماتىدا پىشاق جاراقاتىنان اۋرۋحانادا قازا تاپقان. سپورتشى قالا ورتالىعىندا كٶلٸگٸنٸڭ جانىندا ەلدەكٸمدەر سالعان پىشاق جاراقاتىنان اۋرۋحاناعا جەتكٸزٸلگەن سوڭ قايتىس بولعان. الدىن-الا دەرەك بويىنشا, ول كٶلٸگٸنٸڭ ايناسىن ۇرلاعان ادامداردى توقتاتپاق بولعان كەزدە جارالانعان.
تەننٸڭ ٶلٸمٸنە قاتىستى ٸستە ٷش كٷدٸكتٸ بار. ولار - نۇرالى قيياسوۆ, ارمان قۇدايبەرگەنوۆ جەنە جانار تولىباەۆا. قيياسوۆ جەنە قۇدايبەرگەنوۆكە قىلمىستىق كودەكستٸڭ "بۇزاقىلىق" جەنە "ادام ٶلٸمٸ" باپتارى بويىنشا ايىپتار تاعىلعان. ال تولىباەۆا "قىلمىستى حابارلاماۋ" ايىبى بويىنشا كٷدٸككە ٸلٸنگەن. بۇدان بٶلەك, ٷشەۋٸنە دە ٶزارا كەلٸسٸپ "ۇرلىق جاسادى" دەگەن ايىپ تاعىلعان.
