«Ádilet» partiiasynyń kandidattary Raýan Kenjehanuly, Maksim Rojin, Únzila Shapaq, Renat Bekturov jáne partiianyń ózge de ókilderi Túrkistan oblysynyń turǵyndarymen kezdesti.
Partiianyń baspasóz qyzmeti jariialaǵan fotosýretterge qarasaq, shara resmi formatta emes, erkin pikir almasý túrinde ótken. Jinalǵan jurt esep úshin emes, kókeiindegi saýaldarǵa naqty jaýap alý úshin kelgen. Tiisinshe, turǵyndar tarapynan aitylǵan másele az bolǵan joq.
«Ádilet» partiiasynyń respýblikalyq sailaýaldy shtaby óńirlerdi aralaýdy Túrkistan oblysynan bastady. Quryltai depýtattyǵyna kandidattar jergilikti turǵyndarmen kezdesip, sailaýaldy baǵdarlamanyń negizgi basymdyqtaryn tanystyrdy. Kezdesý barysynda halyqty tolǵandyrǵan ózekti máseleler talqylanyp, turǵyndardyń usynys-pikiri tyńdaldy.
Turǵyndar jol sapasy, aýyldardaǵy aýyzsý tapshylyǵy, gaz tartý, jaiylym jáne sýarmaly jerdiń jetispeýi, jastardy jumyspen qamtý men shaǵyn kásipti qoldaý máselelerin kóterdi.
Partiia tóraǵasy Aibek Dádebaidyń aitýynsha, óńirlerdi aralaýdaǵy basty maqsat – resmi is-shara ótkizýmen shektelmei, halyq únine qulaq asyp, turǵyndardyń naqty suranysyn óz aýzynan estý.
«Túrkistan – rýhani ári ekonomikalyq áleýeti zor óńir. Búgingi ashyq dialog halyqtyń oń ózgeristerge degen seniminiń joǵary ekenin kórsetti. Biz aldaǵy sailaýǵa tek daýys suraý úshin kelgen joqpyz. Sizderdiń senimderińizdi aqtaýǵa, elmen birge jaýapkershilik júgin arqalaýǵa keldik», - dedi Aibek Dádebai.
Sondai-aq ol búgingi kezdesýde aitylǵan árbir suraq mindetti túrde qaralatynyn jetkizdi.
«Kentaý, Arys, Saýran jáne Túrkistannyń turǵyndarynan túsken aryz-shaǵymnyń bári bizdiń jeke baqylaýymyzda bolady. Bundai kezdesý óńirdegi máseleni tek esepten emes, adamdardyń kózimen kórýge múmkindik beredi», - dep atap ótti partiia tóraǵasy.
Quryltai depýtattyǵyna kandidat Raýan Kenjehanuly partiianyń «Ádiletti bolashaq úshin» sailaýaldy baǵdarlamasyn tanystyryp, negizgi baǵyttaryna toqtaldy. Onyń aitýynsha, qujatta eldiń aldaǵy damý baǵytyn aiqyndaityn jeti strategiialyq maqsat pen 10 basym baǵyt aiqyndalǵan.
«Biz usynatyn baǵdarlamada memleket qandai sheshim qabyldamasyn, báriniń negizinde adam, onyń qadir-qasieti, ál-aýqaty men ómirden laiyqty oryn tabý múmkindigi tur. Biz ár adam eńbegine, bilimi men jaýapkershiligine qarai tabysqa jete alatyndai múmkindikter ekonomikasyn qurǵymyz keledi. Al osy maqsattyń ólsheýli, uǵynyqty suraýy bar mejesi retinde biz aldymyzǵa jeti naqty maqsat qoiyp, sol maqsattarǵa aldaǵy bes jylda jetýge mindetteme almaqshymyz», - dedi Raýan Kenjehanuly.
Partiia ókilderiniń aitýynsha, kezdesý barysynda kóterilgen barlyq usynys pen ótinish nazarǵa alynyp, odan ári pysyqtaý úshin respýblikalyq sailaýaldy shtabqa jiberiledi.
Al partiia kandidattary aldaǵy ýaqytta eldiń ózge óńirlerine baryp, turǵyndarmen ashyq formattaǵy kezdesýlerin jalǵastyrady.
Daiyndaǵan:
«Ádilet» partiiasynyń baspasóz qyzmeti.
«Ádilet» partiiasy» QB sailaý qorynyń qarajaty esebinen tólendi.
Tapsyrys berýshi: N.T. Myńjasarov.
