«Ádilet» Partiiasynyń Tóraǵasy Aibek Dádebai Iskerlik keńes qurylǵanyn kólik-logistika salasynyń ókilderimen ótken kezdesýde málimdedi. Is-sharaǵa ortalyq memlekettik organdardyń, iri kompaniialar men salalyq birlestikterdiń basshylary qatysty. Bul týraly partiianyń baspasóz qyzmetine silteme jasap ult.kz habarlaidy.
Kezdesýde Memleket basshysy elimizdiń ekonomikalyq ósiminiń negizgi baǵyttarynyń biri retinde aiqyndaǵan kólik-logistika salasyn damytý máseleleri qaraldy.
Aibek Dádebaidyń aitýynsha, qýatty biznes pen memleket, kásipkerler jáne sarapshylar qoǵamdastyǵy udaiy ózara yqpaldasyp otyrmaiynsha, ekonomika turaqty damymaidy. Sondyqtan «Ádilet» partiiasynyń Iskerlik keńesi dialog qurýǵa jáne ortaq sheshimder ázirleýge arnalǵan turaqty alańǵa ainalady.
