«Ádilet» partiiasynyń Iskerlik keńesi alańynda partiia Tóraǵasy Aibek Dádebai taý-ken metallýrgiia kesheni kásiporyndarynyń basshylarymen, memlekettik organdardyń jáne salalyq qaýymdastyqtardyń ókilderimen kezdesti. Kezdesý barysynda salany damytý, otandyq kásiporyndarǵa qoldaý kórsetý, jańa óndiris oryndaryn ashý, shikizatty tereń óńdeý, injenerlik kadrlar daiarlaý syndy ózekti máseleler talqylandy.
Kezdesýdi ashqan Aibek Dádebai Qazaqstannyń mineraldy shikizat qory asa bai ekenin atap ótti. Salanyń áleýeti eń aldymen el ekonomikasyn damytý jolynda qyzmet etýge tiis.
«Bul – tek ekonomikalyq másele ǵana emes. Bul – ádildik máselesi. Jer bailyǵy halyqtyń ál-aýqatyna ainalýǵa tiis. Sondyqtan «Ádilet» partiiasy Prezidenttiń tereń óńdeý salasyn damytýǵa, jańa óndiris oryndaryn ashýǵa jáne joǵary deńgeide óńdelgen ónim kólemin ulǵaitýǵa baǵyttalǵan strategiialyq baǵdaryn tolyq qoldaidy», – dedi partiia Tóraǵasy.
Onyń aitýynsha, tabiǵi resýrstardy paidalaný tásilin ózgertý qajet. Memleket shikizatty eksporttap, sol shikizattan óndirilgen daiyn ónimdi satyp alyp otyrǵan kezde negizgi tabys, jańa óndirister men jumys oryndary Qazaqstannan tys jerde qalyptasady. Sondyqtan shikizatty tereń óńdeý isin damytý qadamy ónerkásip saiasatynyń negizgi basymdyqtarynyń birine ainalýǵa tiis.
«Taý-Ken Samuryq» UTK» AQ-nyń málimetinshe, ótken jylǵy qorytyndy boiynsha taý-ken metallýrgiia kesheni memlekettiń jalpy ishki óniminiń shamamen 8%-yn qamtamasyz etti. Óndirilgen ónim kólemi 14 trln teńgeden asyp, eksport kólemi 21,4 mlrd AQSh dollaryn qurady. «Taý-Ken Samuryq» UTK» AQ basqarma tóraǵasy Nariman Absametovtiń aitýynsha, búginde taý-ken metallýrgiia kesheni memleket úshin strategiialyq mańyzǵa ie bolyp otyr.
«Sirek kezdesetin mineraldarǵa qoljetimdilik memlekettiń jahandyq básekege qabilettiligin aiqyndaityn mańyzdy faktorlardyń birine ainalýda. Qazaqstan biregei mineraldy shikizat bazasyna ie jáne ony tiimdi igerý qadamy elimizdiń álemdik naryqtaǵy pozitsiiasyn nyǵaitýǵa múmkindik beredi», – dedi Nariman Absametov.
Talqylaý barysynda sala ókilderi birqatar júieli máseleni kóterdi. Atap aitqanda, Taý-ken óndirýshi jáne taý-ken metallýrgiialyq kásiporyndardyń respýblikalyq qaýymdastyǵynyń atqarýshy direktory Nikolai Radostovets temirjol tasymaly sala úshin strategiialyq mańyzǵa ie ekenin atap ótip, tranzittik tasymaldan túsetin kiristerdi bólýdiń neǵurlym teńgerimdi tásilin qarastyrýdy usyndy.
«Qazaqmys korporatsiiasy» JShS basqarma tóraǵasy Rýslan Óskenáli salany odan ári damytý máselesi memleket, biznes jáne qoǵam arasyndaǵy turaqty ózara is-qimyldy talap etetinin atap ótti.
«Ádilet» partiiasynyń Iskerlik keńesi otandyq ónerkásipti damytýǵa jáne Qazaqstan ekonomikasyn nyǵaitýǵa baǵyttalǵan bastamalardy ázirleitin tiimdi alańǵa ainalatynyna senimdimin», – dedi Rýslan Óskenáli.
Qatysýshylar kásiporyndardy jańǵyrtý, investitsiia tartý jáne bilikti kadrlar daiarlaý máselelerine de erekshe nazar aýdardy. Kezdesýge qatysýshylar tabiǵi resýrstar jańa óndiristerdi iske qosýǵa, zamanaýi tehnologiialardy engizýge jáne jańa jumys oryndaryn ashýǵa negiz bolýǵa tiis ekenin atap ótti.
«Qarmet» AQ basshysy Vadim Basin kásiporynda júrgizilip jatqan aýqymdy jańǵyrtý jumysy týraly aityp, qaýipsizdikke, eńbek jaǵdaiyna jáne kásibi kadrlarǵa investitsiia salmaiynsha óndiristi damytý múmkin emes ekenin jetkizdi.
«Ónerkásip sektory úshin ádildik – adamnyń eńbegin qurmetteý degen sóz. Kásiporyn qaýipsizdik esebinen emes, óz aldyna damýǵa tiis. Investitsiia tek jabdyqtarǵa ǵana emes, adamdarǵa da baǵyttalýy kerek», – dedi Vadim Basin.
Kezdesýdi qorytyndylai kele Aibek Dádebai búginde salany damytý máselesin talqylap qana qoimai, onyń júzege asyrylýyn qamtamasyz etý asa mańyzdy ekenin atap ótti. Ol Iskerlik keńes otyrysynyń qorytyndysy boiynsha «Ádilet» partiiasy taý-ken metallýrgiia salasyn damytýǵa arnalǵan biryńǵai bastamalar toptamasyn ázirleitinin málimdedi. Onyń negizine biznes ókilderiniń, salalyq qaýymdastyqtardyń jáne sarapshylar qoǵamdastyǵynyń usynystary engiziledi.
«Búgin naqty ári shyn máninde asa mańyzdy óte kóp usynys aityldy. Olardyń árqaisysy jan-jaqty qaralyp, júielenip, Iskerlik keńestiń aldaǵy jumysynyń bir bóligine ainalady. Bizdiń mindetimiz – biznes pen memleket arasyndaǵy dialogtyń kún saiyn jalǵasýyn qamtamasyz etý», – dep túiindedi Aibek Dádebai.
Kezdesý sońynda «Ádilet» partiiasynyń jańa múshelerine partiialyq biletter tabystaldy.
