2026 jylǵy 7 mamyrda Astanada «Ádilet» saiasi partiiasynyń quryltai sezi óz jumysyn bastady. Sezge Qazaqstannyń barlyq óńirinen shamamen 1000 delegat qatysyp jatyr. Sezd aiasynda Qazaqstan Respýblikasynyń zańnamasyna sáikes partiia qyzmetin resmi bastaý úshin qajetti sheshimder – jarǵysy men baǵdarlamasyn bekitý, sondai-aq basshylyq organdaryn aiqyndaý josparlanǵan.
«Ádilet» partiiasynyń negizgi qundylyqtary retinde ádilettilik, patriotizm, jaýapkershilik, eńbekqorlyq jáne damý jariialandy. Partiia óz baǵdarlamasynda ádilettiliktiń negizi «Zań men Tártip» qaǵidaty ekenin atap ótedi.
Partiia Qazaqstandaǵy kez kelgen adal eńbek – mamandyq pen jumyspen qamtý túrine qaramastan – ádil ári laiyqty baǵalanatyn jaǵdai qalyptastyrýdy maqsat etedi. Jan-jaqty jańǵyrtý baǵytyn qoldai otyryp, «Ádilet» eldiń tehnologiialyq, ziiatkerlik jáne institýtsionaldyq derbestigin qalyptastyrýdy jaqtaidy.
Baǵdarlamalyq ustanymdarda adami áleýetti nyǵaitýǵa erekshe nazar aýdarylǵan. Bul densaýlyq saqtaý, bilim berý, ǵylym, mádeniet jáne kreativti indýstriialardy damytý arqyly júzege asyrylmaq. Partiia meditsinany formaldy esepterge emes, adam densaýlyǵyna baǵyttalǵan modelge kóshirýdi, sondai-aq alǵashqy meditsinalyq kómekti kúsheitip, meditsina qyzmetkerlerine laiyqty eńbek jaǵdaiyn jasaýdy qoldaidy.
Memlekettik qurylym máselesinde partiia eldiń shynaiy básekege qabilettiligi óńirlerdiń teńgerimdi damýyna bailanysty dep sanaidy. Árbir óńir ortalyq tarapynan ádil nazarǵa ie bolýy tiis.
Halyqaralyq arenada «Ádilet» Qazaqstannyń jaýapty orta derjava ári jahandyq qaishylyqtardy teńgerýge qabiletti turaqtandyrýshy kúsh retindegi mártebesin nyǵaitýdy kózdeidi.
Sonymen qatar, partiia saiasi jaýapkershiliktiń jańa standartyn engizbek. Atap aitqanda, árbir partiianyń sailaýshylar aldynda baǵdarlamadaǵy ár tarmaq pen berilgen ár ýáde boiynsha turaqty túrde jariia esep berý tájiribesin qalyptastyrý usynylady.
Partiia músheligine 18 jasqa tolǵan, Jarǵy men Baǵdarlamany moiyndaityn Qazaqstan Respýblikasynyń azamattary qabyldana alady. Zań boiynsha saiasi birlestikterge qatysýǵa tyiym salynǵan tulǵalar partiiaǵa múshe bola almaidy.
Eske salsaq, 15 sáýirde bastamashyl top jańa partiia qurý nieti týraly resmi málimdeme jasaǵan bolatyn. Al 16 sáýirde QR Ádilet ministrligi tiisti habarlamanyń qabyldanǵanyn rastady. Osylaisha, 7 mamyrdaǵy quryltai sezi uiymdy qurý jolyndaǵy mańyzdy kezeńderdiń biri bolyp otyr.
Partiia sezge zańda belgilengen 5000 múshelik mejeden asyp, 9812 múshemen kelip otyr. Sondai-aq ár oblys pen respýblikalyq mańyzy bar qalalardan keminde 200 músheden bolýy týraly talap ta oryndalǵan.
Quryltai sezi tek formaldy tirkeý rásimi ǵana emes, sonymen qatar Qazaqstandaǵy saiasi qatysý mádenietin damytý men ókildi demokratiia institýttaryn nyǵaitý jolyndaǵy mańyzdy qadam retinde baǵalanýda.
