QR Úkimetiniń baspasóz ortalyǵynda ótken baspasóz konferentsiiasy kezinde QR ádilet ministri Marat Beketaev zańdardy ázirleý jáne qabyldaý sharalaryn jetildirý týraly aityp berdi, dep habarlaidy "Ult aqparat".
M. Beketaevtyń aitýynsha, qazir Qazaqstanda Qazaqstanda 340 derbes zań, onyń ishinde 21 kodeks bar. Tiimdi quqyqtyq ortany qalyptastyrý protsesi jalǵasýda, zańdar ǵana emes, olardy ázirleý men qabyldaý rásimderi de jetildirýdi talap etedi.
«Quqyqtyq orta halyq úshin, biznes úshin, sonymen birge sheteldik investorlar úshin de básekege qabiletti jáne tartymdy bolýy tiis. Zańnamanyń turaqtylyǵy investorlarǵa investitsiialar salý úshin memleket tańdaý kezinde mańyzdy ólshem bolyp tabylady. Investorlar bizde zańdardyń turaqty ekenin, al olardy ázirleý men qabyldaý tártibi úzdik sheteldik praktikalarǵa sáikes keletinin bilýi tiis», — dedi ádilet ministri.
M. Beketaev atap ótkendei, bul rette halyq zań jobalaryn qoǵamdyq talqylaýǵa qatysýy jáne usynylyp otyrǵan bastamalar boiynsha óz ustanymdaryn belsendi bildirýi kerek.
«Osyǵan bailanysty, biz zańdardy ázirleý, qoǵamdyq talqylaý jáne qabyldaý bóligindegi halyqaralyq tájiribeni zerdeledik, sondai-aq otandyq zań shyǵarýdyń problemalyq máselelerine taldaý júrgizdik. Júrgizilgen jumystyń qorytyndysy boiynsha zań normalaryn shyǵarýdy jetildirý máseleleri boiynsha zańnamalyq túzetýler toptamasyn ázirlendi», — dedi ádilet ministri.
Birinshi. Ulybritaniianyń tájiribesi boiynsha zań normalaryn shyǵarý protsesine «Jasyl» jáne «Aq» kitaptyń jańa kezeńderin engizý usynylady.
Ministrdiń aitýynsha, bul qujattar bar máselelerdi sheshý úshin talqylaýdy estý, yntalandyrý jáne qoǵamdyq pikirdi eskerý úshin paidalanylady.
«Jasyl» kitap degenimiz - naqty problemalar egjei-tegjeili qaralatyn, sodan keiin saiasat pen zańnama turǵysynan is-qimyldardyń yqtimal baǵyttary kórsetiletin úkimettik jariialanym, aldyn ala esep. Jasyl kitap qoǵammen jáne aldaǵy ózgeristermen múddelerine áser tigizetin nysanaly toptarmen – steikholderlermen muqiiat talqylanady», — dep túsindirdi M. Beketaev.
«Jasyl» kitapty talqylaý merzimi belgilenbeidi, oǵan bir-eki ai, jarty jyl nemese bir jyl da ketýi múmkin. Barlyǵy máseleniń sipatyna bailanysty. Alaida, sheteldik praktika, nátijeli talqylaýlar úshin qajetti merzim kem degende úsh ai ekendigin kórsetedi.
«Jasyl» kitap talqylaýdy yntalandyrý quraly jáne zańdy ózgertýge birinshi qadam bolady», — dedi ádilet ministri.
Eger «Jasyl» kitapty talqylaý barysynda sheshim reformalar qajettiligi paidasyna sheshilse, onda talqylaý jańa satyǵa – «Aq» kitapty daiyndaýǵa ótedi.
M. Beketaev habarlaǵandai, «Aq» kitaptardy memlekettik organdar aldaǵy retteý saiasatynyń resmi málimdemesi retinde shyǵarady, onda zańnamalyq ózgerister nemese jańa zańdar qabyldaý boiynsha naqty usynystar belgilenedi.
«Aq» kitaptar Zań jobalaý qyzmeti máseleleri jónindegi vedomstvoaralyq komissiianyń otyrysynda talqylanatyn bolady. Atalǵan komissiiamen maquldanǵan «Aq» kitaptar zań jobalaryn ázirleý úshin negiz bolady», — dedi ministr.
«Jasyl» jáne «Aq» kitaptar zań jobasyn zań shyǵarý protsesiniń barlyq satylaryn, tipti Prezident qol qoiǵanǵa deiin súiemeldeitinin jáne zań qabyldanǵannan keiin de mindetti qosymshalarǵa ainalatynyn aita ketken jón.
Ekinshi. Zań jobalary men qoldanystaǵy zańdardy baǵalaý rásimderin jaqsartý usynylady.
Ol úshin «Aq» kitap satysynda ázirleýshi organ usynylǵan zańnamalyq ózgeristerdi engizgennen keiin qol jetkizýge nietti naqty indikatorlardy anyqtaýy tiis.
Úshinshi. Zań jobalaryna ǵylymi quqyqtyq saraptamany júrgizý tártibin qaita qaraý usynylady.
«Zań jobalaryna ǵylymi saraptama júrgizýdiń qoldanystaǵy tártibi qolda bar ǵylymi áleýetti tolyq kólemde paidalanbaidy. Sondyqtan ǵylymi saraptama daiyndaýǵa qazirgidei bir ǵylymi uiymnyń qatysýynyń ornyna, úlken sarapshylardyń tizimin qalyptastyrý usynylady», — dedi M. Beketaev.
Tórtinshi. Bizneske jáne azamattarǵa qosymsha mindetter júkteitin normalarǵa qatysty «ótpeli kezeń» praktikasyn zańnamalyq deńgeide belgileý usynylady.
Qabyldanǵan zańdar sheńberinde bolatyn aldaǵy ózgerister týraly qoǵamǵa tiisinshe túsindirý jumysyn júrgizbeýi jáne qoǵamnyń olarǵa daiyn bolmaýy, jańa zańdardaǵy normalardyń durys qabyldanbaýyna ákeledi. Osy rette memlekettik organdardyń biznes pen azamattardyń daiyndyǵyn eskere otyryp, jańa retteýdi qoldanysqa engizý merzimin belgileýi usynylady.
Besinshi. Aldaǵy zańnamalyq ózgerister týraly halyqqa jáne bizneske aqparat berý jáne túsinikteme berý tetikterin kúsheitý usynylady. Bul úshin árbir zań jobasyna jáne qabyldanǵan zańǵa aqparattyq súiemeldeý baǵdarlamasy qosa beriletin bolady.
Altynshy. Zań normalaryn shyǵarý protsesine jasandy intellekt elementterin, sondai-aq derekterdiń úlken kólemimen jumys isteýge arnalǵan taldaý quraldaryn engizý usynylady.
M. Beketaevtyń aitýynsha, «E-zańnama» aqparattyq júiesi aiasynda júrgiziledi. Zań shyǵarý protsesine qatysýshylardy osy júiege qosý máselesi boiynsha jumystar júrgizilýde, sonymen birge basqa júielermen integratsiialaý máseleleri pysyqtalýda.
Sózin aiaqtaǵan ádilet ministri aitylǵan tásilderdi memlekettik organdar qoldaǵanyn, olar boiynsha jurtshylyq pen biznes qoǵamdastyqtyń usynystary alynǵanyn jetkizdi. Zań jobasy qazirgi ýaqytta Úkimettiń qaraýynda.
