Foto: ashyq derekkózden
Ádilet ministrliginiń resmi ókili Talǵat Ýáli avtorlardyń quqyǵyn buzatyn karaoke-barlardy jappai tekserýge qatysty pikir bildirdi, dep habarlaidy Kazinform agenttigi.
«Kúni keshe keibir buqaralyq aqparat quraldarynda «Ádilet ministrligi karaoke-barlarda aitylatyn ánder úshin jappai tekseris júrgizip, avtorlyq quqyqtyń buzylǵany týraly hattama toltyryp, aiyppul salady» degen aqparat tarady. Bul aqparat sál burmalanǵan», - dedi resmi ókil.
Onyń atap ótýinshe, karaoke-barlarda oryndalatyn án úshin avtormen kelisim jasalyp, 3 AEK mólsherinde jarnasy tólenýi kerek. Sodan keiin ǵana oryndaýǵa bolady. Tipti, bul úshin Qylmystyq kodeks aiasynda jaýapkershilik te qarastyrylǵan.
«Biraq Ádilet ministrligi «karaoke-barlardy tekseredi, jabady, qysym kórsetedi» degen áńgime shyndyqqa janaspaidy. Kerisinshe qazir Ádilet ministrligi avtorlyq quqyqtyń buzylýyn Qylmystyq kodeksten Ákimshilik kodekske aýystyrýǵa, iaǵni qylmys dep tanymaýǵa belý býyp otyr. 2024 jyldan bastap osy jumystarǵa kirisedi. Qandai da bir avtorlyq quqyq buzylsa, onda ákimshilik jaýapkershilik qarastyrylatyn bolady. Al karaoke-barlarǵa qatysty Ádilet ministrligi qandai da bir tekserý ótkizbeidi. Degenmen qoǵamdyq jerde án ne shyǵarma oryndalyp, sol týyndynyń avtory quqyǵynyń buzylǵandyǵyn aityp, Ádilet ministrligine shaǵymdansa, onda zań aiasynda tekseris júrgiziledi. Karaoke-barlarda kóbine halyq ánderi, jekelegen avtorlardyń ánderi oryndalady. Eger án avtorynyń qaitys bolǵanyna 70 jyldan astam ýaqyt ótken bolsa, ol halyqtyń qazynasy retinde tanylyp, oryndalǵany úshin eshqandai aiyppul salynbaidy», - dedi Talǵat Ýáli.
