Ádilet ministrligi Konstitýtsiiaǵa ózgerister engizý jáne astanany qaita ataý týraly Prezidenttiń jarlyǵyna qatysty túsinikteme berdi, dep habarlaidy "Ult aqparat" ministrliktiń resmi saityna silteme jasap.
Búgin 23 naýryzda QR Prezidenti Qasym-Jomart Toqaev Konstitýtsiiaǵa ózgerister engizý týraly Zańǵa qol qoidy. Sondai-aq Prezident Astanany qaita ataý týraly tiisti Jarlyqqa qol qoidy.
Marat Beketaev Elordany qaita ataý týraly Konstitýtsiiaǵa túzetýler tolyqtai QR Konstitýtsiiasy men zańdaryna sáikes engizilgenin taǵy da atap ótti. Ádilet ministri osy protsedýranyń zańdyq qyrlary týraly aityp berdi.
Ádilet ministrligi Konstitýtsiianyń 91-babynda kózdelgendei, astanany qaita ataý úshin referendým ótkizý týraly máseleni Prezidenttiń qaraýyna engizý úshin Jarlyq jobasyn ázirledi. Bul usynysty Úkimet qaýly túrinde Qasym-Jomart Toqaevqa jiberdi. Zań boiynsha, mundai jaǵdaida Prezident ne onyń ókilettigin ózine qabyldaǵan tulǵa úsh sheshimniń birin qabyldaýy tiis:
1) máseleni Parlamenttiń qaraýyna berýge,
2) suraqty respýblikalyq referendýmǵa shyǵarýǵa,
3) Konstitýtsiiaǵa túzetýler engizý týraly usynysty qabyldamaýǵa.
Prezident birinshi joldy tańdap, máseleni Parlamenttiń qaraýyna berdi. Joǵary zań shyǵarýshy organ óz kezeginde palatalardyń birlesken otyrysynda Konstitýtsiiaǵa túzetýler engizý týraly zań qabyldady. Aita ketý kerek, Parlament ony Konstitýtsiianyń 91-baby 2-tarmaǵynyń talaptaryna sáikestigi týraly Konstitýtsiialyq Keńestiń oń qorytyndysy bolǵan jaǵdaida qabyldai alady. Budan ári zań Parlament palatalary spikerleriniń jáne Premer-Ministrdiń qoldarymen bekitiledi jáne Prezidentke qol qoiýǵa jiberiledi. Qol qoiylǵan sátten bastap Konstitýtsiiaǵa ózgerister engizý týraly zań kúshine endi.
Ádilet ministri "Qazaqstan Respýblikasynyń ákimshilik-aýmaqtyq qurylysy týraly" Zańǵa sáikes Astanany qaita ataý úshin qajetti jumys júrgizilgenin, sonyń nátijesinde Prezident astanany qaita ataý týraly Jarlyqqa qol qoiǵanyn atap ótti.
Belgilengen rásimge sáikes Úkimet Prezidentke oblystarǵa, aýdandarǵa, qalalarǵa ataý berý jáne olardy qaita ataý jóninde usynystar engizedi. Bul respýblikalyq onomastika komissiiasynyń qorytyndysy negizinde jáne tiisti aýmaq halqynyń, onyń jergilikti ókildi jáne atqarýshy organdarynyń pikirin eskere otyryp júrgiziledi.
Ol úshin máslihattyń turaqty komissiialarynda jariia tyńdaýlar ótkizý jolymen tiisti aýmaq halqynyń pikiri eskeriledi, olardyń qorytyndylary boiynsha hattama resimdeledi. Bul jaǵdaida tyńdaýlar 20 naýryzda ótti jáne tiisti hattama astana.gov.kz saitynda ornalastyrylǵan. Tyńdaýlar men hattama negizinde qalalyq máslihat pen ákimdik respýblikalyq onomastikalyq komissiiaǵa tiisti usynys engizdi. Komissiianyń qalany qaita ataý týraly oń qorytyndysy 20 naýryzda alyndy.
Ádilet ministri qysqa merzimge qaramastan, barlyq rásimder qoldanystaǵy zańnamaǵa qatań sáikestikte júrgizilgenin taǵy da atap ótti. Marat Beketaev elordaǵa Elbasy - Nur-Sultan esimin berý týraly sheshim Qazaqstan tarihyndaǵy mańyzdy oqiǵa bolyp tabylatynyn atap ótti.
