Aliment tóleý boiynsha qordy qurý aqshany tegin taratýdy qarastyryp otyrǵan joq. Bul týraly Ádilet ministrliginiń keńeitilgen alqa májilisinen keiin vedomstvonyń basshysy Marat Beketaev málim etti, dep habarlaidy QazAqparat.
«Aqshany tegin taratý degen bolmaidy. Osy oraida qor qurylǵannan keiin barlyq bereshek qarajat ózinen-ózi jabylady dep oilaý durys emes», - dedi M. Beketaev tilshiler saýalyna jaýap bere otyryp.
Onyń aitýynsha, búginde mundai qordyń eki modeli bar. Birinshisi – kredittik model, al ekinshisi qaiyrymdylyq negizde qyzmet etedi. Kredittik model banktik zaimdar qaǵidasy boiynsha jumysty eskeredi. Bul turǵyda adam eńbekaqy alǵansha deiin tiisti kezeńge aliment tóleý úshin qarajat surai alady.
Ekinshi modelge sáikes, iaǵni qaiyrymdylyq qor aiasynda aqsha qaitarymsyz beriledi. Alaida barlyǵyna birdei berile bermeidi.
M. Beketaevtyń aitýynsha, búginde Qazaqstanda qaiyrymdylyq modeldi paidalaný usynylyp otyr.
«Aqsha eń qiyn jaǵdailarda beriledi. Adamdar syrtqatqa shaldyqsa nemese múldem qiyn jaǵdaiǵa tap bolsa, basqa múmkindikter bolmasa, qoldaý jasalady. Qaiyrymdylyq model tiisti komissiia men keńesti qurýdy eskeredi. Onyń quramyna tájiribeli mamandar tartylady. Sheshim qabyldarda komissiia shaqyrtylady. Máselen, bir adamdarǵa 100 myń teńge, keibirine 500 myń teńge qajet bolýy múmkin», - dedi ministr.
