Foto: abai.kz
Halyqaralyq «Ádil sóz» sóz bostandyǵyn qorǵaý qory QazTAG bas direktory Áset Mataev pen agenttiktiń bas redaktory Ámir Qasenovke qatysty qozǵalǵan qylmystyq iske pikir bildirdi, dep habarlaidy agenttikke silteme jasap Ult.kz.
«Halyqaralyq «Ádil sóz» sóz bostandyǵyn qorǵaý qory HAA „QazTAG“ bas direktory Áset Mataev pen agenttiktiń bas redaktory Amir Qasenovke qatysty qozǵalǵan qylmystyq is jáne tergeý áreketterin júrgizý kezinde jiberilgen zańbuzýshylyqtarǵa bailanysty qatty alańdaýshylyq bildiredi. Búgin shamamen 11:00-den 16:00-ge deiin Astana qalalyq politsiia departamentinde HAA „QazTAG“ bas direktory Áset Mataevtan jaýap alý jalǵasty. Osydan keiin birden tergeý toby agenttiktiń bas redaktory Ámir Qasenovten jaýap alýǵa kiristi», — dep málimdedi qor.
«Ádil sóz» HAA QazTAG Qazaqstandaǵy eń tájiribeli ári yqpaldy aqparat agenttikteriniń biri ekenin atap ótedi. Qordyń aitýynsha, bul jai ǵana buqaralyq aqparat quraly emes, eldiń qazirgi tarihynyń mańyzdy bóligi.
«Aqparattyq keńistiktiń eleýli bóligi jahandyq platformalardyń algoritmderine táýeldi bolyp jatqan qazirgi jaǵdaida ulttyq táýelsiz mediany saqtaý — qoǵam úshin de, memlekettiń aqparattyq qaýipsizdigi úshin de asa mańyzdy másele», — delingen habarlamada.
«Ádil sóz» qory quqyq qorǵaý organdaryn qylmystyq-protsestik zań normalaryn qatań saqtaýǵa, tergeý áreketteriniń ashyqtyǵyn qamtamasyz etýge jáne jýrnalisterdiń kásibi quqyǵyn qorǵaýǵa shaqyrdy. Uiym ókilderi jaǵdaidyń damý barysyn muqiiat baqylaýda ustaityndaryn aitty.
Eske salaiyq, QazTAG basshylyǵyna qatysty qylmystyq istiń negizine Freedom Finance-taǵy alaiaqtyqtan zardap shekkender men olardyń advokatynyń kórsetýleri alynǵan. 2025 jylǵy 3 sáýirde olar redaktsiiaǵa qońyraý shalyp, QazTAG jariialaǵan aqparat Freedom Finance-tiń múddesine sai berilgen dep shaǵymdanǵan. Olar buqaralyq aqparat quraldaryna jete almai júrgenderin, quqyq qorǵaý organdarynda jáne prezident ákimshiliginde ádildikke qol jetkize almai otyrǵandaryn aitqan.
Osy jaǵdaiǵa bailanysty Jýrnalisterdi qorǵaý komiteti (CPJ) de QazTAG basshylyǵyna qarsy qozǵalǵan qylmystyq iske alańdaýshylyq bildirdi.
Advokat Rena Kerimova málimdegendei, jábirlenýshilerdiń advokaty YouTube-te jariialanǵan videoda tek Svetovoi men basqa tulǵalarǵa qatysty qylmystyq iske bailanysty derekterdi ǵana aitqan, ádeii jalǵan aqparat taratpaǵan. Keiin agenttiktiń bas redaktory Ámir Qasenov:
«Stalin dáýirinde de, búgingi kúni de adal jýrnalisterdi únsiz qaldyrýdyń jalǵyz tásili — qylmystyq qýdalaý bolyp otyr», — dep atap ótti.
