Bas prokýrordyń orynbasary Erlik Kenenbaev ustalǵandar óz týystaryna qaida ekenin aitýǵa quqyǵy bar ekenin málimdedi, dep habarlaidy Sputnik Qazaqstan.
Májiliste adam quqyǵyn qorǵaý týraly dóńgelek ústelde depýtat Snejanna Imasheva kóp adam ustalǵan jaqyndarynan esh habar ala almaitynyna shaǵymdanatynyn aitty.
Bas prokýrordyń orynbasary Erlik Kenenbaevtyń aitýynsha, prokýratýra organdaryna osyǵan qatysty 258 aryz-shaǵym túsken.
"Ár shaǵymdy muqiiat tekseremiz. Zań boiynsha eger adam ustalsa, ol óz týystaryna habar berýge quqyly. Sondai-aq oǵan advokat beriledi. Jai ǵana qamap tastaý degen bolmaidy. Bul jaily aqparatty asyra siltep jibergen. Tergeý organdary ár ustalǵan azamat boiynsha advokattyń qatysýymen qajetti sharalar júrgizedi, oǵan týysqandaryna aitý quqyǵy beriledi", - dedi Kenenbaev.
Aitýynsha, terrorlyq aktilerge qatysqandardyń deni qorǵaýshysy retinde óz týystaryn tańdaidy. Biraq prokýratýra ár jaǵdaida jeke-dara tekseredi.
Kenenbaev 90-nan astam adam qamaýdan bosatylǵanyn, aýyrlatatyn mán-jai bolmaǵandyqtan kóbiniń bultartpaý sharasy ózgertilgenin eske saldy. Biraq olar qylmystyq jaýapkershilikten qutylmaidy.
