Foto: prokuror.gov.kz
Sybailas jemqorlyqqa qarsy is-qimyl agenttiginiń tóraǵasy Marat Ahmetjanov Qazaqstanda para berý qalypty jaǵdaiǵa ainalyp bara jatqanyn aitty, dep habarlaidy Sputnik Qazaqstan.
Aitýynsha, búginde sybailas jemqorlyq qylmysynyń sipaty ózgergen. Jemqorlar jańa zamanǵa beiimdeldi.
"Jemqorlyq shemalarynda aila-tásil kóbeiip, aqyldy, júieli bola tústi. Basqasha aitqanda, biýrokratiialyq kedergiler ádeii jasalyp, zańsyz baiý maqsatynda erejeler kúrdelene túsýde. Al laýazymdy tulǵalardyń fýnktsionaldyq mindetterinde olardy jaýapkershilikten bosatatyn olqylyqtar men aila-amaldar qarastyrylǵan", - deidi ol ortalyq kommýnikatsiialar qyzmetinde ótken brifingte.
Osylaisha adamdy para berýge májbúrleitin jaǵdai qoldan jasalady. Jekelegen azamattarǵa óz problemasyn mundai jolmen sheshken ońai. Ókinishke qarai, para berý qalypty jaǵdaiǵa, ómir saltyna ainalyp barady, deidi agenttik tóraǵasy.
Máselen, onyń málimetinshe, 2015 jyly "Para berý" baby boiynsha faktiler barlyq tirkelgen qylmystyń nebári 10 protsentin qurasa, biyl kórsetkish úshten birdi quraǵan.
"Iaǵni, adamdar sheneýnikterdi sanaly túrde paramen satyp alady. Kóbine olar túrli ruqsat, memlekettik qyzmet, memlekettik satyp alýdaǵy jeńis jáne taǵy basqa úshin para beredi. Sol sebepti sybailas jemqorlyqqa qarsy sharalardy qaita qaraý talap etiledi", - dedi ol.
Aitýynsha, qazir qoldanystaǵy salalyq zańnyń maqsaty – jemqorlyqpen kúres emes, oǵan qarsy is-qimyl.
"Is-qimyl" sóziniń maǵynasy tereń: bul sybailas jemqorlyq sebepterin túp-tamyrymen joiýǵa baǵyttalǵan qylmystyq jáne profilaktikalyq sharalar kesheni. Iaǵni, qylmyskerlerdi ustaý ǵana emes, memlekettik basqarýdyń kem-ketikterin joiý. Sol sebepti biz saldarmen kúresýden jemqorlyq táýekelderin joiý jáne qylmystyq shemany ashýǵa kóshemiz", - dedi ol.
