QR Parlamenti Májilisiniń depýtaty Saýytbek Abdrahmanov Qordaidaǵy janjalǵa qatysty pikir bildirdi, dep habarlaidy QazAqparat.
«Osydan bir jarym ǵasyrdai ýaqyt buryn Qytaida Tsin biligine qarsylyq kóterilisi ótken. Ol kóterilis aiaýsyzdyqpen basyp-janshylǵan. Kóteriliske shyqqandar musylman dinin ustanǵany úshin qýdalanǵan, qorlanǵan dúngender edi. Aqyry olar qazaq jerine kóship, baýyrmal babalarymyzdan pana tapty. Sodan beri ortaq taǵdyr keship kelemiz. Aldyńǵy jyly biz, Parlament Májilisine Qazaqstan halqy Assambleiasynan sailanǵan bir top depýtattar, Jambyl oblysynyń Qordai aýdanyna baryp, dúngenderdiń qazaq jerine kóship kelýiniń 140 jyldyǵyna arnalǵan saltanatty is-sharaǵa qatysyp qaitqan bolatynbyz. Sol joly elimizdegi etnostardyń jarasymdy tirligine taǵy da kóz jetkizgenbiz. Mine, dál sol jerden jan aýyrtatyn jaman habar jetip, júregimiz syzdap tur», - dedi Májilis depýtaty.
Saýytbek Abdrahmanov Qordai aýdanynyń jekelegen eldi mekenderinde jappai tóbeles bolyp, onyń aiaǵy adam ólimine ákelip soqtyrǵanyn, úiler órtelip, kólikter qiratylǵanyn atap ótti. Onyń aitýynsha, qazir oqiǵanyń shyǵý sebepterin, zardaptaryn, naqty kinálilerdi anyqtaityn úkimettik komissiia qurylyp, bul másele Memleket basshysynyń tikelei baqylaýynda tur.
«Ol oqiǵa qalai bolsa da, myna jaidyń basy ashyq: adamdar arasyndaǵy kelispeýshilikke etnostar arasyndaǵy kelispeýshilik sipatyn berýdiń eshqandai zańdyq negizi joq jáne bolýy da múmkin emes. Qazaqstan halqynyń ǵasyrlar boiy qalyptasqan dástúrli dostyǵynyń beriktigi daý týǵyzbaidy. Sonymen birge oryn alǵan olqylyqtarǵa baǵa berýdi, kinálilerdi jazalaýdy jekelegen adamdardyń óz qolyna alýǵa tyrysýynyń da zańsyzdyǵyn basa aitý kerek. Memlekettegi zańdylyqty saqtaýǵa memlekettiń áleýetti qurylymdary mindetti jáne olar buǵan qabiletti. Ol qurylymdarǵa senimsizdik kórsetýdiń eshqandai reti kelmeidi. Sonymen qatar, osyndai oqys oqiǵalar tusynda otqa mai quiatyndardyń, jerden jeti qoian tapqandai alaýlatyp, jalaýlatyp jóneletinderdiń, jurtty jeliktirip jiberetinderdiń kóbeiip ketetini, olardyń áleýmettik jelilerdegi jaýapsyzdyǵy adamdar tragediiasyna sebepker bolatyndyǵy taǵy bar. Tiisti oryndar áleýmettik jelilerge, messendjerlerge monitoring jasap, halyqty arandatýshylardy anyqtaýǵa, tiisti quqyqtyq baǵasyn berýge tiis. «Qulaq buzylsa, qulyq buzylady» degendi bizge abyz aǵamyz Ábish Kekilbaev eskertip ketken bolatyn», - dedi Saýytbek Abdrahmanov.
Buǵan deiin Jambyl oblysynyń Qordai aýdanyndaǵy Masanchi aýylynyń turǵyndary arasynda jappai tóbeles bolǵanyn habarlaǵan bolatynbyz.
Kóp ýaqyt ótpei Prezident Qasym-Jomart Toqaev Jambyl oblysy Qordai aýdanynda bolǵan jappai tóbeleske qatysty pikir bildirdi.
«Jambyl oblysy Qordai aýdanynda buzaqylyq sipattaǵy jappai tóbeles boldy. Ony arandatýshylar óz paidasyna qoldanbaq bolǵan. Politsiia jaǵdaidy rettep, óz baqylaýyna aldy. Qoǵamdyq tártipti buzǵandar jaýapkershilikke tartylady», dep jazdy Qasym-Jomart Toqaev Twitter-degi paraqshasynda.
Al búgin Memleket basshysy Jambyl oblysyndaǵy oqiǵaǵa bailanysty málimdeme jasady.
