Adam jegish Nikolai Jumaǵaliev týraly «Úsh» atty film kórermenge jol tartty, dep habarlaidy QazAqparat.
Filmniń rejisseri - Rýslan Pak. Ol Ońtústik Koreiada turady. «Úsh» - onyń Qazaqstanda túsirgisi kelgen ekinshi tolyqmetrajdy filmi.
«Men bala kúnimde filmdegi basty keiipker maniak Jumaǵaliev týraly jii estidim. Jaqynda men osy qylmyskerdi ustaý operatsiiasyn basqarǵan adamdy kezdestirdim. Men odan kóptegen jaǵa ustarlyq málimetterdi estip, bildim. Bul kinematografiialyq oqiǵa ekenin túsindim», - dedi Rýslan Pak.
Týyndyda tutas Keńes úkimetin úrei qushaǵynda ustaǵan qanisherdiń jaǵa ustatar qylmystary kórsetiledi. Tipti avtorlar jurtty dúr silkindirgen istiń el bile bermeitin derekterin de týyndyǵa qosqan. Filmniń stsenarii 80-jyldary bolǵan jantúrshiktirer oqiǵalarǵa negizdelgen.
Týyndyda militsiianyń arnaiy bólimshesine tájirbieden ótýge kelgen Sadyqovtyń ómiri baiandalady. Jumysqa kirisken alǵashqy kúnnen-aq jas tergeýshi qandy qylmystardy ashýmen ainalysatyn topqa ilesip, buryn-sońdy kórmegen sumdyqtardyń kýá bolady.
«Filmde órimdei qyzdardyń janyn alyp, qanyn iship, etin jegen atyshýly Nikolai Jumaǵalievtiń qylmystary kórsetiledi. Tártip saqshylary úiin tintý kezinde bólshektelgen adamdardyń máiitin tabady. Alaida qanypezerdiń ózi qashyp qutylyp ketedi. Maniaktyń kelesi qurbany – Sadyqovtyń úlken ápkesi bolady. Sadyqov úshin maniakty ustaý qyzmettik paryzy ǵana emes, jeke kek alýǵa ainalady», - deidi rejisser.
Filmde basty rólderdi Asqar Iliiasov, Samal Esliamova, Erjan Túsipov, Nurjan Sadybekov jáne reseilik akter Igor Savochkin somdaidy.
«Men akterlerdiń beinesine qarap, irikteýden ótkizdim. Olarmen kórisip, sóilesip, kimniń qandai obrazǵa sai keletinine bailanysty tańdadym. Biz filmdi bir aidyń ishinde 24 túsirilim kúninde bitirdik. Mundai úlken kólemdegi týyndyǵa bul óte az ýaqyt. Sebebi, túsirilim toby úilesimdi jumys istep, barlyǵy jeńil túsirildi», – deidi filmniń rejisseri Rýslan Pak.
Film osydan úsh jyl buryn Almatyda túsirilip, bir jyldan keiin Pýsandaǵy halyqaralyq kinofestivalde arnaiy syilyqpen marapattaldy.
Qazaqstandaǵy premeradan keiin «Úsh» filmi Koreiada keń prokatqa shyǵady.
