Jaz maýsymy qutqarýshylar úshin damylsyz jumys isteitin ýaqyt deýge bolady. Osy rette TJM mamandary Almatyda baspasóz konferentsiiasyn ótkizip, demalys ýaqytynda taýly aimaqta turǵyndardy saq bolýǵa shaqyrdy.
Jaz maýsymynda Almaty taýlaryna shyǵatyn týristerdiń qutqarýshy shaqyrýyna májbúr bolatyn kederi jii bolady eken. QR TJM «Respýblikalyq qutqarý qyzmeti «Barys» RMM qutqarý bólimshesiniń bas qutqarýshysy Pavel Voskoboinikovtyń aitýynsha ondai jaǵdailar tipti táýligine úsh-tórt retke deiin bolady.
Mamannyń sózinshe kez kelgen taý shyńy qaýip tóndirýi múmkin. Ásirese Medveje jáne Kúmbelsý shatqaldaryna shyqqan kezde saq bolýǵa keńes beredi. Bul shatqaldar arnaiy jabdyqtar men fizikalyq daiyndyqty talap etetin kórinedi. Budan bólek taýǵa shyqqanda aýa raiynyń ózgerýin, kúnniń batý ýaqytyn eskerý qajet jáne júrip ótetin jolyńyzdy jaqsylap zerttep alǵan durys eken.
Mamannyń sózinshe taý shyńyna shyǵarda týys-týǵandaryńyzǵa júretin jolyńyzdyń baǵytyn naqty aityp ketkenińiz jón.
«Taýǵa kettim» degen sóz bolmaidy: qutqarýshylar kem degende shatqaldyń ataýy men baratyn jerińizdi bilip otyrýy qajet», – deidi Pavel Voskoboinikov.
Bul qutqarýshylardyń jumysyn jeńildetip, izdeý ýaqytyn álde qaida qysqartýy múmkin.
sońǵy ýaqytta taýǵa 14–16 jastaǵy kámeletke tolmaǵandar óz betimen taýǵa jii baratyn bolypty. Ata-analar olardyń marshrýtyn, qai ýaqytta qaitatynyn bilip, balalarymen únemi bailanysta bolýy kerek.
Bas qutqarýshy taýdyń kúrdeli marshrýttarymen nársetemen jáne úi janýarymen barýǵa keńes bermeidi. Sebebi sábi tez tońyp qalýy múmkin, al úi janýary taýdaǵy jabaiy ań-qusty úrkýi yqtimal.
«Ol adam birinshi óziniń daiyndyǵyna qaraidy. Keri qaitatyn jolyna jete ala ma, joq pa ekenin shamalap túsinýi qajet. Qansha shaqyrym jol júrgenin esepteýi kerek. Mysaly keide adamdar qalanyń shamdaryn kóredi de, sol baǵytqa qarata júre beredi. Sóitip jarǵa nemese ózen-kólge kelip tireledi. Odan keiin keri qaitýǵa shamasy bolmaidy. Eger turǵan jerinde internet bailanysy bolsa, geolokatsiiasyn qutqarýshylarǵa jiberýi kerek. Bailanys bolsa, 112-ge habarlasyp, óziniń turǵan jerin aitqany jón. Eger bailanys bolmasa, ózi sharshap turǵan kúiinde keri qaitamyn dep taǵy bir jaǵdaiǵa urynyp qalmas úshin sol jerde toqtap, shatyry bolsa, tigip, sol jerde túnep, kúsh jinap, kelesi kúni jolǵa qaita shyqqany durys», – deidi QR TJM «Barys» respýblikalyq qutqarý qyzmeti» RMM qutqarý bólimshesiniń bas qutqarýshysy Dámen Serik.
Qutqarýshylar taýdan qorqýdyń qajeti joq ekenin, alaida oǵan qurmetpen qaraý kerektigin eske saldy.
