QR Adam quqyqtary jónindegi ýákil Elvira Ázimova «Adam quqyqtary jáne zań ústemdigi týraly» zań jobasy jóninde aityp berdi, dep habarlaidy QazAqparat.
«Bul zań boiynsha naqty sheshim qabyldandy. Sáýirdiń aiaǵynda «Adam quqyqtary jáne zań ústemdigi týraly» jobany Úkimet qarady. Oń sheshim qabyldandy. Halyqaralyq tájiribege qarasaq, kóptegen memleket osyndai zańdy qabyldady. Bul adam quqyqtaryn qorǵaý ǵana emes, profilaktika jáne áleýmettik problemalarǵa bailanysty, adam satý jaǵdaiy buzýshylyqtary jasalǵanda qylmystyq jaýapqa tartý ǵana emes – osyndai jaǵdaiǵa túsken adamdarǵa kómek kórsetý», - dedi Ázimova Ortalyq kommýnikatsiialar qyzmetinde ótken baspasóz máslihatynda.
Onyń aitýynsha, Qazaqstanda adam saýdasy qylmys retinde zańnamalyq turǵyda qarastyrylady, bas bostandyǵynan aiyrýǵa deiin tiisti qylmystyq jaýapkershilik bekitilgen. Qylmystyq kodekste kámeletke tolmaǵandardy «satyp alý jáne satý» qylmysy bólek quramda jazylǵan.
«Mundai faktiler Qazaqstanda bar. Biz muny qoǵamǵa qaýipti qubylys retinde aitamyz. Óitkeni is júzinde bul qylmys adamnyń birqatar quqyqtaryna nuqsan keltiredi. Ókinishke orai, biz adam saýdasy týraly aitqanda mundai faktiler jappai sipatqa ie bolmaidy, tipti adamdar mundai jaǵdaiǵa erkinen tys qana emes, óz kelisimimen de barady. Kóbinese olar jumys tabý qiyndaǵandyqtan kúmándi, kúdikti eńbek jaǵdailaryna kelisedi, zańbuzýshylyqqa ózderi barady. Munda politsiia qansha jerden tiimdi jumys istegenimen, másele ashyq kúiinde qalady. Atap aitqanda, jumyspen qamtý, áleýmettik qorǵaý máseleleri jáne tájiribe kórsetkendei, adamdar bul jaǵdaiǵa birneshe ret barady, iaǵni qylmys uzaqqa sozylady. Sondyqtan basqa memlekettik organdar men uiymdardyń aldyn alý, eskertý, taldaý jumystary óte mańyzdy. Bul tek anyqtaýǵa jáne jazalaýǵa baǵyttalǵan jumys emes, eldiń áleýmettik saiasatymen bailanysty tájiribe, sondyqtan biz osy zańnyń qabyldanýyn qoldaimyz», - dedi Ázimova.
Onyń aitýynsha, kelesi jyldyń birinshi jartysynda zań jobasy Úkimetke usynylyp, keiin ony talqylaýǵa depýtattar da qosylýy kerek.
