Shymkentte politsiia kámeletke tolmaǵandardy jezókshelikpen ainalysýǵa, jeńgetailyqqa, sondai-aq, uiymdasqan qylmystyq top quramynda jynystyq qanaý maqsatynda adam saýdasyna tartý deregi boiynsha qylmystyq isti tergep jatyr, - dep habarlaidy Polisia.kz.
Tergeý barysynda olardyń qylmystyq áreketteri Shymkent, Túrkistan jáne Taraz qalalarynda júzege asyrylǵany anyqtaldy. Toptaǵy rolder naqty bólingen. Onyń uiymdastyrýshylary úsh apaly-sińli bolyp shyqty. Olar senimdi adamdarymen birge qylmystyq áreketterdi úilestirgen.
Qorqytý men bopsalaý, "aiyppuldar" arqyly qyzdardy sintetikalyq esirtki qoldanýǵa jáne aqyly (keide ártúrli taýar úshin de) jynystyq qyzmet kórsetýge májbúrlegen.
Toptyń keibir músheleri jas áielder men qyzdardy izdeýmen ainalysqan. Olarmen tanysyp, senimine kire otyryp, osy "iske" tartqan. Qyzdardy áleýmettik jeli arqyly Qaraǵandy, Semei, Atyraý, Shymkent, Taraz, Qyzylorda qalalary men Túrkistan oblysynan tapqan. Bilet satyp alý men turýǵa ketken shyǵyndy qylmystyq toptyń uiymdastyrýshylary tólegen.
Toptyń basqa músheleri "ákimshi" jáne "kassir" rolin atqarǵan. Olar qyzdardyń tártibin qadaǵalap, esep pen kassa júrgizip, internettegi jarnamalar arqyly tabylǵan "klientterdi" qabyldap otyrǵan.
Qylmyskerlerdiń tapqan tabysy shamamen 150 million teńgeni quraidy.
Jynystyq saýdanyń qurbandary arasynda 17 men 25 jas aralyǵyndaǵy 14 qyz bar, onyń ishinde alty qyz - kámeletke tolmaǵandar.
Qyzdardy jaldamaly páterlerde ustap, jezókshelikpen ainalysýǵa májbúrlegen. Birqatar jaǵdaida kúdiktiler qyzdardy ózimen birge ertip, qonaqúiler men saýnalarǵa aparǵan. Qyzdar týǵan-týystaryn tynyshtandyrý úshin ata-analaryna bala kútýshi bolyp jumys isteitinderin aitqan. Keibir jaǵdailarda uiymdastyrýshylar qyzdardyń ata-analarymen kezdesýge baryp, ózderin "bala kútýshige jumys berýshi" siiaqty kórsetken.
Barlyǵy 11 adam ustalǵan, olar qazir Shymkenttegi tergeý izoliatorynda qamaýda otyr.
Osy derek boiynsha 18 qylmystyq is qozǵalǵan, onyń ishinde 2 derek Qylmystyq kodeksiniń 262-babynyń 1, 2-bóligi (Uiymdasqan qylmystyq top qurý jáne oǵan qatysý), 5 derek 128-baby (Adam saýdasy), 5 derek 134-baby 3-bóligi (Kámeletke tolmaǵan adamdy jezókshelikpen ainalysýǵa tartý), 2 derek 308-baby (Jezókshelikke tartý), 3 derek 309-baby (Priton ustaý men jeńgetailyq), 1 derek 297-baby (Esirtki zattaryn alý, saqtaý, tasymaldaý) boiynsha tergelip jatyr.
